Li gorî agahiyan, Yavûz piştî hate berdan dest bi kontrolên tenduristiyê kir. Di encama lêkolînan de bi gumana kansera pankreasê dest bi tedawiyê kir. Yavûz ku demekê tedawiya xwe li mala xwe dewam kir, beriya du mehan ji ber giranbûna rewşa wî rakirin Nexweşxaneya Dewletê ya li Qoserê.
Di encama lêkolînê de jî hate tespîtkirin ku Yavûz di asta 4’emîn de bi kansera pankreasê ketiye. Yavûz ku dihate dermankirin, vê sibehê jiyana xwe ji dest da.
Cenazeyê Yavûz rakirin morga nexweşxaneyê. Hate ragihandin ku cenaze wê li taxa Sitîlîlê ya Nisêbînê bê veşartin.
ZÊDEYÎ 30 SALAN LI GIRTÎGEHÊ MA
Yavûz ku sala 1993’an li Nisêbînê hate girtin, ji aliyê Dadgeha Ewlekariya Dewletê (DGM) a li Amedê ve bi cezayê girtîgehê yê heta bi hetayê hate cezakirin.
Di dema ragirtinê de Yavûz li Mêrdîn, Amed, Edene, Samsûn Vezîrkopru û Samsûn Bafrayê di girtîgehê de hate ragirtin.
Dihate payin ku Sibata 2023’an bê berdan, lê belê Desteya Çavdêriya Îdarî ya Girtîgehê taloqkirina Yavûz ji bo 6 mehan taloq kir.
Yavûz bi giştî 30 sal û 6 mehan girtî ma û 5’ê Tîrmeha 2023’an ji Girtîgeha Girtî ya Tîpa M a Bafra ya Samsûnê hate berdan.
‘EZ SERBILIND Û BI RÛMET IM’
Piştî berdanê Yavûz çû gel malbata xwe ya li Îzmîrê, piştre jî vegeriya warê xwe Nisêbînê.
Yavûz heman piştî berdanê daxuyaniyek da û li gel ragirtina salên dûr û dirêj jî destnîşan kir ku wê têkoşîna xwe dewam bike.
Yavûz ev daxuyanî dabû: “Dîroka me ya têkoşînê ya 50 salan bi 10 hezaran mirovî dewam dike. Têkoşîna me bi ked û berxwedana gel mezin dibe. Li girtîgehê jî vê hêvî û baweriyê em li ser piyan dihişt, hêz dida. Di têkoşînê de serê min bilind e, bi rûmet im. Serketin wê ya me be.”
