Kongreya Civakên Demokratîk a Kurdistaniyên li Ewropayê (KCDK-E) û Tevgera Jinên Kurd a li Ewropayê (TJK-E) bi daxuyaniyeke hevpar gotin, “Rageşiya ku bi qetilkirina SÎpan Hiznî destpê kir û kûr bû, li ser gelên me gihîştiye asteke gelekî xetere.”
Daxuyaniyê bi vî rengî dewam kir, “Zêdebûna bûyerên ku êrişê dibe ser hesasiyet û hestên gelên Kurd û Ereb, aliyên herî hesas ên civakê tev didin û dikarin gelan li ber hev rakin, divê tesadufî neyê dîtin.
Weke ku me beriya niha ragihand, di serî de bûyera Şehîd Sîpan Hiznî, bûyerên ku diqewimin zemîneke xetere mezin dike ku dixwaze Kurd û Ereban li ber hev rake, kîn û nefretê bixe nava gelan.
Belavbûna vê rageşiyê li Kobanê, şewata li girtîgehê ku ew girtî lê dihatin ragirtin ku êrişên nijadperest ên hikumeta Şamê şermezar dikin, jidestdana jiyanê ya 9 welatiyên me di şewata li girtîgehê de, birîndarbûna gelek kesan asta metirsîdar a rewşê careke din raxist pêş çavan.
Di serî de malbatên welatiyên me yên jiyana xwe ji dest dan bila serê gelê Kobanê û gelê me yê Rojava sax be. Em ji birîndaran re jî şîfa xêrê dixwazin.
Ji her demê bêhtir berpirsyariyeke mezin e ku li hemberî van provokasyonên metirsîdar jiyana hevpar a gelên me biparêzin, yekîtî û xwişk û biratiya gelên me biparêzin. Li dijî her cûre hewldanên ku dixwaze gelên Kurd û Ereb li ber hev rake divê helwesteke berpirsyarane bê nîşandan, destûr ji provokasyonan re neyê dayin û îradeya jiyana hevpar a gelan bê xurtkirin.”
