Hevserokên Giştî yên DEM Partiyê daxuyaniyeke nivîsîkî weşandin û gotin, “Em di nava krîzekê de ne ku bandorê li temamiya aboriya me û bi milyonan welatiyên me dike.”
Di daxuyaniyê de hate gotin, “Enflasyona ku kronîk bûye, îflasên zêdebûyî, barê deyn ê mezinbûyî, zêdebûna rîskên jeopolîtîk, zema li buhayê sotemeniyê û herî dawî jî kaos û diziya mezin a ji ber bêkontroliya li Borsa Stenbolê… Di aboriya Tirkiyeyê de êdî zingilê alarmê lê dide, ne zingilê hişyariyê. Enflasyon jiyana civakî ber bi rewşeke nediyar ve dehf dide û jiyana şexsî jî tarî dike. Di vî dîmenî de ku buhayê sotemeniyê serê lîtreyekê ji sed lîreyê derbas bûye, desthilatdarî li şûna ku li bêçaretiya bi milyonan mirovî, esnaf, hilberîner û pîşesazan temaşe bike, divê gavên şênber biavêje.
Aboriya Tirkiyeyê di zivistana xwe ya herî dirêj a tarî de ye. Deyndarî gihîştiye asta rekorê, tabloya ku bankayên bi milyaran qezenç dikin afirandine, hêviya civakê hîn bêhtir têk dibe. Qezenca bi serbestî ya ji rant û faîzê dibe sedem ku fikrê qezençkirina bere ya bêyî kedê belav bibe. Ev jî hem saziyan ji holê radike, hem jî zemînê ji rizandina civakî re amade dike.”
Hevserokên Giştî yên DEM Partiyê diyar kirin ku temaşekirina li rewşa heyî ya ku danhevî û hatineya bi milyonan mirovî eleqedar dike, girtîmayina Meclîsê nayê qebûlkirin û gotin, “Heta 1’ê Cotmehê her roja ku derbas bibe wê berdêla krîza aboriyê girantir bike.
Bila her kes zanibe ku paşeroja Tirkiyeyê nabe ku pêşkêşî lîstikên borsayê, baronên faîzê û kapîtalîzma qumarxaneyê bê kirin. Divê em xwêdana vî welatî, ked û paşeroja wê bi hev re biparêzin.
Weke DEM Partî em amade ne ku piştgiriyê bidin her gava ji bo rizgariya vî welatî û vî gelî ji krîz û tengaviyê. Em ê xwe venegirin ku bikevin bin bar. Ji ber ku paşeroja vî welatî meseleya hevpar a me hemûyan e. Banga me eşkere ye: Meclîsa Millet a Mezin a Tirkiyeyê bêyî li benda 1’ê Cotmehê bisekine, ji bo wergirtina tedbîrên pêwîst divê bi rengekî awarte bicive.”
