Li bajarên Qamişlo, Tirbespiyê û Amûdê Komploya Navneteweyî ya li ser Rêber Apo hate şermezarkirin.
QAMIŞLO: Li bajarê Qamişloyê gel xwepêşandan bi dirûşma “Bi însiyatîfa Pêvajoya Aştî û Civaka Demokratîk Komploya Navneteweyî û sîstema Îmraliyê hildiweşe” xwepêşandan organîze kir.
Xwepêşandanê ji Çerxerêya Sonî dest pê kir û heyanî Çerxerêya Şehîdan berdewam kir. Di xwepêşandanê de dirûşmên “Bê Serok jiyan nabe” û “Azadî ji bo Rêber Ocalan” hatin berzkirin.
Piştî deqeyeke rêzgirtinê bi navê Însiyatîfa Gel Şêrîn Dawûd axivî û got, Komploya 9`ê Cotmehê ne tenê li dijî Rêber Apo bû, tevahiya gelê Kurd bû hedef û wiha lê zêde kir: “Azadiya Rêbertî azadiya tevahî gelê Kurd e. Pêvajo hesase û ji bo Pêvajoya Aştî û Civaka Demokratîk bi ser bikeve divê em baş bixebitin û entegrasyona demokratîk fêm bikin. Entegrasyona demokratîk nayê wateya ku gelê Kurd bihelê, divê em ziman, çand û nasnameya xwe tu carî jibîr nekin, ev pêvajo bi dîrok û siberoja me ve girêdayî ye.”
Xwepêşandan bi berzkirina dirûşmên “Bê Serok jiyan nabe” bi dawî bû.
TIRBESPIYÊ: Li bajarê Tirbespiyê jî gel ji avahiya meclisa bajêr heyanî dawiya bazara navendî meşiya. Di meşê de wêneyên Rêber Apo û sembolên kurdî hatin rakirin. Piştî deqeyeke rêzgirtinê endama Însiyatîfa Gel Munteha Mehmûd axivî û got: “Sîstem her tim nasname û çanda gelan înkar dike, gelê Kurd daxwaza mafê xwe yê rewa dike. Her wiha em daxwaz dikin ku Rêber Apo bi fîzîkî azad bibe.”
AMÛDÊ: Her wiha gelê Amûdê jî ji bo şermezarkirina Komploya Navneteweyî ya 9`ê Cotmehê meş li dar xist. Meşê bi dirûşma “Bê Serok jiyan nabe” ji Çerxerêya Jinê dest pê kir û heyanî Qada Şehîd Cîhan dewam kir.
Piştî deqeyeke rêzgirtine rêvebera Partiya Yekitiya Demokratîk (PYD) Nîroz Elî axivî û got ew ê ji bo azadiya fîzîkî ya Rêber Apo çalakiyên xwe dewam bikin.
Her wiha mamoste Arşek Baravî axivî û bal kişand ser rolê civakê di parastina ziman û mafên çandî de, girîngiya zimanê dayikê anî ziman û destnîşan kir ku divê parastina mafê xwe yê xwendina bi zimanê kurdî bikin.
