Li girtîgehên Tirkiyeyê bi taybetî li hemberî girtiyên siyasî binpêkirin û taloqkirina berdanê dewam dike. Li gorî daneyên Komeleya Hiqûqnasan a ji bo Azadiyê (OHD) di nava sê mehên dawî de berdana 90 girtiyan ji aliyê Desteyên Çavdêrî û Îdareyê (ÎGK) ve hate taloqkirin. Desteyên Çavdêrî û Îdareyê ku Kanûna 2020’î ava bûn, bi taybetî bi biryarên têkildarî girtiyên siyasî dibin cihê nîqaşê.
Li gorî daxuyaniyên li nava raya giştî belav bûn, ji Kanûna 2020’î heta Hezîrana 2026’an berdana herî kêm 600 girtiyan hate taloqkirin. Endamê Komeleya Hiqûqnasan a ji bo Azadiyê (OHD) parêzer Omer Taş li ser karkirina Desteyên Çavdêrî û Îdareyê ji ajansa me re axivî.
Omer Taş bi bîr xist ku ÎGK bi giranî di dosyayên siyasî û têkildarî girtiyên siyasî de dikeve rojevê û got, “Ji ber ku ji berdana kesên ji dosyayên edlî ceza li wan hatiye birîn bi giranî nayê taloqkirin. Gava ku dema xwe ya berdana bi şert tê têne berdan.
Lê belê ji bo girtiyên siyasî Desteyên Çavdêrî û Îdareyê veguherîne amûreke cezakirin. Ji roja ku ava bûye heta niha di nava şeş salan de berdana bi sedan kesî hate taloqkirin, betalkirin. Îtirazên li hemberî vê hatin kirin jî ji aliyê dadgeriyên înfazê ve têrker nehate dîtin, lewma hate redkirin. Lewma îtirazên li hemberî vê yekê ji aliyê dadgeha cezayê giran ve bi rengekî bê hincet tê redkirin. Di vir de em heyeteke welê li pêşberî xwe dibînin ku armanca xwe taloqkirin an jî betalkirina berdanê ye.”
Taş diayr kir ku desteyên navborî poşmaniyê li girtiyên siyasî ferz dike û got, “Gelek heval, yan jî tmeamiya wan ji ber ku vê qebûl nakin, berdana wan tê taloqkirin an jî betalkirin.”
Omer Taş destnîşan kir ku têkildarî rewşa desteyan divê hikumet bi berpirsyariya xwe rabe û di pêvajoyeke bi vî rengî de Desteyên Çavdêrî û Îdareyê ji holê bêne rakirin.
Omer Taş qanûna çarçoveyê bi bîr xist û got, “Weke ku tê zanîn meha Tebaxê qanûnek li Rojnameya Fermî hate weşandin û bû qanûn. Lê belê weke xala bicihanînê li benda biryara Desteya Ewlekariya Mîllî ye. Li gorî nêrîna me, piştî ku ji Desteya Ewlekariya Mîllî biryara tespîtê hate dayin û serlêdanên nivîskî kete meriyetê, wê Desteyên Çavdêrî û Îdareyê êdî bê kêr bin û wê neçar bimîne ku biryarên erênî bidin.”
