Muzîsyen û aktîvîst Nûrcan Degîrmencî ku di konferansa “Jin bi hev re li ser paşerojê diaxivin” derkete ser dikê, qala rola jinan a li qada huner û civakî kir. Her wiha bang li jinan kir ku di 25’ê Mijdarê Roja Têokşînê ya Navneteweyî ya li dijî Tundiyê de bi hev re tevbigerin.
Nûrcan Degîrmencî ku sala 1995’an li Navenda Çandê ya Mezopotamyayê dest bi karên hunerî kir, li gel nasnameya xwe ya muzîsyeniyê her wiha weke jineke Kurd jî bi salan e bi jinan re têkoşînê dimeşîne. Degîrmencî bi bîr xist ku sala 2009’an Hewldana Hunerê ya ji bo Aştiyê (BÎS) ava kirin û li vê derê hilberîna hunerî bi têkoşîna ji bo aştiyê geş kirin.
Nûrcan Degîrmencî got, “Di hebûna çandê de huner xwedî girîngiyeke mezin e” û destnîşan kir ku lêgerîna nasnameyê û têkoşîna wê di heman demê de bi berxwedaneke hunerî tê meşandin.
‘ZIMANÊ AŞTIYÊ WÊ JI ALIYÊ JINAN VE BÊ AFIRANDIN’
Nûrcan Degîrmencî anî ziman ku xala esasî ya konferansê ji bo wê ew e ku jin bi hev re ne, bêyî ku çîrokên hev red bike li gel hev disekinin û got, ew bawer dike ku zimanê aştiyê yê vê demê wê ji aliyê jinan ve bê afirandin. Nûrcan Demîrmencî diyar kir ku jin êşên herî giran ên li welêt pêşwazî dikin û axaftina xwe bi vî rengî dewam kir, “Em dikarin bi hev re bêdeng bibin, lê di heman demê de dikarin bi hev re biaxivin û têbikoşin. Lewma sekna jinan a li vê derê ya li gel hev ji bo aştiyê gaveke girîng e.”
TÊKOŞÎNA LI DIJÎ HER CÛRE TUNDIYÊ
Muzîsyen û aktîvîst Degîrmencî işaret bi têkoşîna hevpar a li dijî tundiyê kir ku dema dawî li nava civakê zêde bûye û got, “Em dema dawî dibînin; tundiya li hemberî jinê, zarokan, heywanan û xwezayê tê zêdekirin. Ji medya dîjîtal heta bi siyasetê çareseriya li hemberî vê tundiyê afirandina têkoşîneke hevpar e.”
Nûrcan Degîrmencî anî ziman ku tundiya li malê, kolanan, kargehê, akademiyê û siyasê li hemberî jinan tê kirin ji aliyê cewherî ve yek e û got, “Em jin neçar in ku li hemberî tundiyê li hev bicivin, wekî din rê nîne.”
Degîrmencî bi bîr xist ku ji bo azadiya fîzîkî ya Rêber Apo jinên Kurd salên dûr û dirêj e têkoşîneke bi biryar dimeşînin û diyar kir ku di navenda vê têkoşînê de azadiya jinê heye. Degîrmencî got, “Heta ku jin azad nebe tiştek, kesek azad nabe. Ya girîng ew e ku em hişmendiya zayendî û hêza jinê derxînin holê.”
Degîrmencî ji bo 25’ê Mijdarê bang kir û got, “Ji kîjan derdorê dibe bila bibe divê jin bi rêxistinî li qadan bin. Zimanê aştiyê tenê bi piştevaniyê dikare bê afirandin.”
