Nûnertiya Sêrtê ya Komeleya Alîkariya bi Malbatên Girtiyan re (TUAY-DER) bi wesîleya 25’ê Mijdarê Roja Têkoşînê ya Navneteweyî ya li dijî Tundiya li Jinan li ber avahiya DEM Partiyê ya bajêr daxuyaniyek da. Di daxuyaniya çapemeniyê de nûnerên gelek rêxistinên civakî yên sivîl û partiyên siyasî lê amade bûn, pankarta bi nivîsa “Azadiya jinan avakirina civaka demokratîk e” hate hildan.
Rêvebera navçeya navendî ya DEM Partiyê Zeynep Sahat Yildirim li daxuyaniyê axivî û anî ziman ku tundiya li hemberî jinê ne tenê êrişên fîzîkî ye, astengkirina tedawiyê, astengkirina berdana girtiyan parçeyek ji zextên li dijî azadî û mafên jinan e.
Zeynep Sahat Yildirim destnîşan kir ku berdana girtiyên nexweş nabe ku bi pêşketineke siyasî yan jî bi pêvajoyekê ve bê girêdan.
Bi dewamî anî ziman ku di Pêvajoya Aştî û Civaka Demokratîk de jin tenê muxatab nîne, divê damezrînerên aştiyê bin û got, “Ji ber ku aştiyek bêyî jinan, aştiyek bêyî îradeya azad a jinan nabe aştiyeke civakî.”
Daxuyanî bi dirûşmên “Bijî berxwedana zindanan” û “Girtiyên nexweş rûmeta me ne” bi dawî bû.
ŞIRNEX
Bi pêşengiya Nûnertiya Şirnexê ya Komeleya Piştevaniya bi Malbatên Girtî û Hikumxwaran re ya Botanê bi daxwaza berdana girtiyên jin li ber Edliyeya li Şirnexê daxuyaniyek ji çapemeniyê re hate dayin.
Di daxuyaniyê de pankarta bi nivîsa “Azadiya girtiyên jin nabe bê taloqkirin” hate hildan. Hevseroka TUHAD-DER’e ya Botanê Esra Kadirhan daxuyanî da. Piştî adxuyaniyê ji bo girtiyên jin kevokên spî hatin firandin.

