Li eyaleta Washingtonê ya DYE’yê li Balafirgeha Navneteweyî ya Seattle-Tacomayê ya li nêzî Seattleê, binçavkirina du kesan ji aliyê sîxûrên Daîreya Parastina Koçberî û Gumrukê (ICE) ve bû sedema nerazîbûnan.
Waliyê Washingtonê Bob Ferguson piştî bûyera roja Şemiyê daxuyaniyek da û anî ziman ku ICE “bi temamî ji kontrolê derketiye”. Ferguson li ser hesabê xwe yê medyaya civakî rexne li wê yekê kir ku kesên amadekariya siwarbûna balafirê dikirin, ji aliyê sîxûrên rûgirtî yên ku nasnameya xwe eşkere nekirine ve bi zorê ji pirên derbasbûnê hatine derxistin.
Di dîmenên ku li ser medyaya civakî belav bûne de, tê dîtin ku peywendîdarên rûgirtî du kesên ku li ber siwarbûna balafirê bûn binçav dikin.
Ferguson, got ku ev operasyon mînaka dawî ya “taktîkên ICE’yê yên ku di bingeh de li dijî nirxên Emerîkayê ne”. Ferguson, da xuyakirin ku dibe ku qanûna eyaletê ya ku rûgirtina sîxûran sînordar dike hatibe binpêkirin û ragihand ku tê lêkolînkirin ka peywendîdarên federal çawa derbasî qada siwarbûna balafirê bûne.
ICE’yê jî ragihand ku operasyona sibeha roja Şemiyê ji bo binçavkirina welatiyekî Meksîkayê yê ku dema vîzeya wî qediyaye hatiye lidarxistin. Saziyê, diyar kir ku kesê duyemîn jî bi îdiaya ku qehweya germ avêtiye peywendîdarê federal û êrîşî wî kiriye hatiye binçavkirin û dê der barê wî de karûbarên qanûnî bên destpêkirin.
Şîrketa hewayî ya Alaska Airlinesê ku sefera balafirê pêk dianî, fikarên xwe ya li hemberî destwerdana hêzên ewlehiyê anî ziman û ragihand ku ew çalakiyên kontrola koçberiyê bi rê ve nabin û koordîne nakin. Daîreya Bendera Seattleê ya ku balafirgehê bi rê ve dibe jî hêrsa xwe ya li hemberî bûyerê nîşan da.
Li aliyê din piştî serketina Demokratan a di hilbijartinên navberê yên 3’yê Mijdarê de, Serok Donald Trump yek ji mîmarên xeta tund a polîtîkayên koçberiyê Stephen Miller wekî sekreterê giştî yê nû wezîfedar kir.
Miller di meha Çile ya borî de jî piştî ku sîxûrên ICE’yê li Minneapolisê du xwepêşander bi guleyan kuştibûn, bibû hedefa rexneyên tund.

