Berdevka Partiya Demokrasî û Wekheviyê ya Gelan (DEM Partî) Ayşegul Dogan li navenda giştî ya partiya xwe di civîna çapemeniyê de bûyerên di rojevê de nirxand.
Ayşegul Dogan anî ziman ku divê biryara Dadgeha Mafên Mirovan a Ewropayê ya ji bo berdana Hevserokê Giştî yê berê yê HDP’ê Selahattîn Demîrtaş bi cih bê anîn, gavên pratîkî bêne avêtin û got, “Em hemû bi rojan e kêlî bi kêlî li benda agahiya berdanê ne. Ya ku divê bê kirin diyar e, lê belê nayê kirin. 9 sal in bi israr di bêhiqûqiyê de israr heye. Ragirtina Selahattîn Demîrtaş divê tavilê bi dawî bibe.”
Ayşegul Dogan diyar kir ku Hevşaredarê berê yê Bajarê Mezin ê Amedê Selçûk Mizraikli xwedî mafê berdana bi şert e û got, “Ji bo bicihanîna vî mafê di Îlonê de serî li Desteya Çavdêrî û Îdareyê ya Girtîgehê hate dayin. Dsteyê ev daxwaz red kir. Di hinceta redkirinê de jî hate gotin, ‘Di nava dema ku li saziya me ye eşkere nekir ku ji rêxistina terorê qut bûye’. Ji bo ragirtina Selçûk Mizrakli bi rengekî bêhiqûqî pêwîst nîne ku hûn li hincetekê bigerin.”
PÊWÎSTÎ ÊDÎ BI GAVAN HEYE NE BI GOTINÊ
Ayşegul Dogan bal kişand ser karên Komîsyona Demokrasî, Xwişk-Biratî û Piştevaniya Mîllî jî û got, “Em di demeke welê de ne ku divê êdî gavên li gorî sozên hatine dayin bêne avêtin, pêwîstî bi gotinê nîne. Divê gavên pratîkî, şênber û li gorî hiqûqê bêne avêtin ku edaletê bi cih bîne.”
Têkildarî budçeya tê amadekirin jî Ayşegul Dogan got, “Em ne bawer in ku budçe ne ji bo aramiyê ye. Ji ber vê yekê jî em ji budçeya 2026’an re dibêjin na. Ji bo nan û aştiyê di mehên Mijdar û Kanûnê de ji baskên cuda yên meşê em ê ber bi Enqereyê ve bimeşin.”
DIVÊ KOMÎSYON BIÇE ÎMRALIYÊ
Ayşegul Dogan di civînê de bersiv da pirsên rojnamevanan û destnîşan kir ku divê komîsyon li ser mijara çûyîna Girava Îmraliyê ne bi guman be. Ayşegul Dogan got, “Berevajî vê yekê neçûyîna Îmraliyê di heman demê de wê bibe sedema jidestdana firsendeke mayinde. Bloka desthilatdariyê jî di vê mijarê de divê nêzîkatiya xwe nîşan bide ku nebe cihê ti nîqaşê. Beriya çend rojan Serokê Meclîsê diyar kir ku weke serokê komîsyonê wê endamên komîsyonê bi vê rojevê bicivîne. li gorî me divê komîsyon biryara çûyîna Îmraliyê bide.”
