Hevserokê Giştî yê Partiya Demokrasî û Wekheviyê ya Gelan (DEM Partî) Tûncer Bakirhan di Newroza Amedê de ji sed hezaran kesî re axivî.
Tûncer Bakirhan got, “Dilê Rojhilata Navîn îro li Amedê lê dide. Ne tenê Rojhilata Navîn bala çar aliyên cîhanê li qada Amedê ye, li qada Newrozê ye. Ji ber Amed Newroz e, Newroz Amed e. Hûn Newroz in. Em cejna Newrozê li Birêz Ocalan pîroz dikin ku gelê Kurd kiriye gelê Newrozê.
Ev bang li Mezopotamya û Anatoliyê banga çareseriyê û ji nû ve destpêkirina dîrokî ye. Birêz Ocalan di meşa çareseriya demokratîk de ku sala 1993’an da destpêkirin, gava herî dîrokî di 27’ê Sibatê de bi banga sedsalê avêt. Ev bang nîşandana rastiya gelekî ye ku sed sal in li ber xwe dide û bi dehan sal in ji bo çareseriya demokratîk têdikoşe. Ev bang manîfestoya jiyana bi hev re ya gelên Mezopotamya û Anatoliyê ye. Cewhera Banga Aştî û Civaka Demokratîk lihevkirina demokratîk e. Ev bang mîladek e, xwediyê vê bangê hûn gelê me yê bi rûmet ê li qada Amedê ne.
We berdêlên giran dan û em gihandin ber serketineke bêhempa. Ji pirsgirêkeke dîrokî em ber bi çareserî û aştiyeke dîrokî ve diçin.”
Hevserokê Giştî yê DEM Partiyê Tûncer Bakirhan anî ziman ku nêzîkatiya antî-demokratîk, tekperest, înkarê ya pirsgirêka Kurd ji bo gelên Tirkiyeyê sed sal da windakirin û got, “Xizanî û birçîbûn ji gelên Tirkiyeyê re anî. Lê belê bi banga sedsalê re êdî berê me li paşerojê ye, em dixwazin aştiyê ava bikin. Kilîta deriyê aştiyê çareseriya pirsgirêka Kurd e, Tirkiyeya demokratîk e. Rêya çareseriyê ya pirsgirêka Kurd, ruhê wê banga sedsalê ya Birêz Ocalan e ku di 27’ê Sibatê de kir. Çareseriya vê pirsgirêkê êdî nikare bê taloqkirin.
Ji ber ku li herêmê em di nava senaryoyeke qiyametê de ne. Rêya rizgariya ji vê qiyametê tifaqa Kurd-Tirk, wekhevî û demokrasî ye. Ji ber vê yekê em dixwazin destnîşan bikin: Avjenî li hemberî herikîna avê nabe, siyaseta şaş nabe cihekî rast. Rêya me komara demokratîk e. Hevalên hêja, binihêrin hemû rêyên ku zanin bi ku ve diçin vekirî ne. Em bi rêya xwe zanin. Nirx û dilxwaziya me ya aştiyê rêya me diyar kir. Berê rêya me li komara demokratîk e. cewhera rêya me bi banga 27’ê Sibatê xwe nîşan da. Em di siyasetê de li aliyê kesî nînin. Em li aliyê demokrasî, edalet, wekhevî û nirxên azadiyê ne. Rêya me şaş nîne, rêya me rêya 3’yemîn e ku jiyaneke azad, wekhev û demokratîk diafirîne. Em ê meşa xwe ya li ser rêya 3’yemîn dewam bikin. Bi ruhê Newrozê, bi baweriya Kawa, bi wêrekiya Mazlûm em ê bimeşin. Dawiya vê rêyê aştî ye, dawiya vê rêyê demokrasî û azadî ye. Ev xak sed sal in hesretê aştiyê ye. Niha dem hatiye ku dengê aştiyê bê bihîstin û hîn bi xurtî bê bilindkirin. Aştiya ku li pêşiya me ye, divê em pêk bînin.”
PEYAMA MESÛD BARZANÎ
Endamê Polîtburo ya PDK’ê Serbest Lezgîn jî peyama Serokê Giştî yê PDK’ê Mesûd Barzanî li Newroza Amedê xwend.
Di peyamê de hate gotin, “Hêvî dikim ku Abdullah Ocalan di dema herî nêz de bê berdan. Em piştgiriyê didin pêvajoya aştî û çareseriyê ya li Tirkiyeyê. Ji bo çareseriya pirsgirêkan aştî rêya yekane ye. Hêvîdar im êşên Kurdên li Sûriyeyê bi lezgînî bi dawî bibe.”
NÊÇIRVAN BARZANÎ JÎ NEWROZ PÎROZ KIR
Serokê herêma Kurdistanê ya Federe Nêçirvan Barzanî jî peyamek ji Newroza Amedê re şand. Barzanî Newroz li hemû Kurdistaniyan pîroz kir. Barzanî bal kişand ser banga Rêber Apo û spasiya hemû aktoran kir ên ku piştgiriyê didin pêvajoyê.
Barzanî diyar kir ku divê her kes bi dil û can ji bo aştiyê bixebitin û got, “Ji bo aştiyê çi bikeve ser milê me em amade ne bikin.”
