Li Edeneyê Newroz li Şanoya Servekirî ya Mîmar Sînan bi coşeke mezin tê pîrozkirin. Gel di saetên sibehê de ketin rê, bi dirûşmeya ‘Bijî Serok Apo’ ketin qadê. Welatiyên ku bi nîşaneyên serkeftinê û sloganên xwe ketin qadê gelek caran dirûşmeyên; ‘Bijî Serok Apo’, ‘Bê Serok jiyan nabe’, ‘Bijî berxwedana zindanan’ û ‘Jin, jiyan, azadî’ berz kirin. Di pîrozbahiya ku ji 7 heta 70 salî bi hezaran kes beşdar bûn de zêdebûna jin û ciwanan bal kişand.
Welatiyên ku bi cil û bergên neteweyî beşdarî pîrozbahiyê bûn li qadê rawestiyan û li benda destpêkirina pîrozbahiyê man. Di pîrozbahiya ku bi her deqeya derbas dibe re coş zêde bû de, azadiya fîzîkî ya Rêber Apo hat qîrîn. Li qadê bênavber dirûşmeyên; ‘Bijî Serok Apo’ û ‘Bê Serok jiyan nabe’ hatin berzkirin.
Pîrozbahî piştî deqeyek rêzgirtinê destpê kir. Hevserokên Komîteya Tertîp Şehristan Yigit û Yaşar Demîr gel silav kirin û Newroza wan pîroz kirin. Piştre Dayikên Aştiyê, Hevseroka Giştî ya DEM Partiyê Tulay Hatîmoğulları û Hevserokê Giştî DBP’ê Bayindir bi hev re agirê Newrozê pêxistin. Bi pêxistina agir re li qadê coş hê zêdetir bû.
Li ser navê Dayikên Aştiyê ku agirê Newrozê vêxistin Şemse Bagdu axivî û diyar kir ku ew wek dayik aştiyê dixwazin. Hevserokên DEM Partiyê yên Edeneyê Hêlîn Kaya û Seyfettîn Aydemîr jî xwestin ku Newroz bibe wesîleya aştî û azadiyê.
Piştre Hevserokê Partiya Sosyalîst a Bindestan (ESP) Mûrat Çepnî axivî, Newroz li gel pîroz kir û wiha got: “Ji bo aştî, demokrasî û sosyalîzmê bijî Newroz.”
Hevserokê Giştî yê Konfederasyona Sendîkayên Karmendên Gelemperiyê (KESK) Ahmet Karagoz diyar kir ku ew her roj bi binçavkirin, zext û girtinên nû dest bi rojê dikin û banga têkoşîna hevpar kir.
Piştre Hevserokê Giştî yê DBP’ê Keskîn Bayindir axivî û wiha got: “Ciwanên Edeneyê em we baş nas dikin. Em we bi qehremaniyan nas dikin. Newroz pîroz be. Ev Newroz agirê azadiyê yê Dayikên Aştiyê ye. Em vê Newrozê diyarî dayikên xwe dikin. Rêberê Gelê Kurd Abdullah Ocalan Newroza 2025’an wek ‘Newroza azadiyê’ bi nav kir. Hevalên hêja, ev Newroz Newroza Aştî û Civaka Demokratîk e. Ji sala 1992’an û vir ve gelê Kurd bi berdelên mezin dan. Rêberê Gelê Kurd Abdullah Ocalan bi banga sedsalê re rê li ber azadiyê vekir. Gelê Kurd li her dera Kurdistanê, Rojhilata Navîn û cîhanê piştgirî da. Em îro li Edeneyê piştgiriyê didin vê bangê. Gelo hûn amade ne?
Li Stenbolê di operasyonên siyasî de Ekrem Îmamoglû û hevalên wî binçav kirin. Ev siyaset we nagihîne cihekê. Hûn ji aliyekî ve dibêjin, ’em ê bi Kurdan re rê li ber aştî û yekîtiyê vekin’ û li aliyê din jî hûn dibêjin, ’em ê vîna gel desteser bikin’. Em baş dizanin ku ev xespkirina îradeyê ye. Cara sêyemîn e li dijî vîna gelê Kurd qeyûm tên tayînkirin. Me di destpêkê de got ku ev yek wê bi Kurdistanê re sînordar nemîne û me dît ku îro li Tirkiyeyê jî pêk tê. Îro em dibêjin; Em ê desteserkirina vîna gelê Stenbolê qebûl nekin. Çawa ku me li Wan û Êlihê qebûl nekir, em ê Stenbolê jî qebûl nekin. Divê hikûmet bizanibe ku aştî bi wan re nayê van xakan. Siyaseta qirêj a van zaliman wê bi têkoşîna gelê Kurd re biqede. Bi têkoşîna xwe em ê dawî li vê siyaseta durû û siyaseta qirêj bînin.
Duh kesekî heqaret li gelê Kurd kir. Em ê bersivekê bi Tirkî bidin wî. Her kes dikare li qadê, hemû hevrêyên me ala di destê xwe de bilind bike? Hemû gel li qadan e. Şaredarê Bajarê Mezin ê Enqereyê Mansûr Yûsûf ku duh li otobusê heqaret li nirxên me kir, aciz nebe. Ev der qada gel e, ev der qada azadiyê ye. Eger hûn ê hikûmetê rexne bikin, hûn ê li ser bingeha nirxên gelê Kurd vê nekin. Divê ti kes bi heqareta li Kurdan û nirxên wan, xwe mafdar nebîne. Em ê destûrê nedin vê. Hefteya pêşiya me Cejna Remezanê ye. Bila hemû Kurdistanî û bi taybetî li Edeneyê kartên li ser wêneyên zarokên di Newrozê de hatin qetilkirin cih digirin ji Mansûr Yavaş bişînin û li ser piştê ‘Mansûr Yavas ê faşîst’ binivîsînin. Gelê Kurd wê azad bibe. Gelê Kurd wê azadiya Birêz Abdullah Ocalan bibîne. Em ê vê azadiyê diyarî dayikên xwe bikin. Em ê deriyê hemû girtîgehan bi taybet deriyên Rêberê Gelê Kurd Abdullah Ocalan vekin. Em ê ji bo vê têbikoşin. Me tu caran serê xwe ne tewandine, em ê serê xwe netewînin. Tu amade yî, Edene? Îro dinya li te guhdarî dike. Îro çavên Rojavayê Kurdistanê li te ye.”
Pîrozbahiya Newrozê bi axaftina Hevseroka Giştî ya DEM Partiyê Tulay Hatîmogullari berdewam dike.
