Mîhrîcana Fîlman a Navneteweyî ya Rojava ya 5ˊan di roja 4ˊemîn de bi pêşkêşkirina fîlm û kurtefîlman li Navenda Mihemed Şêxo ya Çand û Hunerê û Tevgera Çand û Hunera Demokratîk a Mezopotamya li Qamişloyê didome. Vê êvarê belgefîlma “Naharina” ji derhêneriya Ferran Domènech û berhemdana Şêrîn Hesen e hat pêşandan. Belgefîlm bi amadebûna hezkirên sînema, derhêner, nivîskar, hunermend û şêniyan hat pêşkêşkirin.
Li gorî bernameyê, li Navenda Mihemed Şêxo kurtefîlm û fîlm ji saetên sibehê ve hatin pêşkêşkirin. Fîlma The Steak, kurtefîlma “I ran and ran”, belgefîlma “Naharina” di navbera saet 16.00ˊan heta 17.00ˊan de hatin pêşandan. Dûre belgefîlma “Mard Ai, Siamak, Ghatee” û”Heza” û fîlma “ADHURA HVAAB” hatin pêşandan.
Di heman warî de li Navenda Tevgera Çand û Hunera Demokratîk a Mezopotamya (TEV-ÇAND) fîlma “Destên Terikî”, belgefîlma “Rojek bi şîvan re”, fîlmeke Sûrî “The day i los may shadow”, fîlmeke Kurdî “Demsala Nan (The Bread Season), fîlma “The Elephant Tree”, kurtefîlma “Farwell” û fîlma Kurdî “Şîgerar Seîn” hatin pêşandan.
Vê êvarê jî belgefîlma “Naharina ” ji rewşa civakî ya Bakur û Rojhilatê Sûriyeyê hat pêşandan. Belgefîlm balê dikişîne ser dozên civakê, veguherînên siyasî û civakî li Bakur û Rojhilatê Sûriyeyê.
Navê belgefîlmê “Naharina” anku gelên çemê. Ev nav ji bo gelên li keviyên çemên Firat û Xabûrê de dijîn. Belgefîlm bi zimanê Kurdî hat pêşkêşkirin.
Belgefîlm behsa guhertinên li herêmê yên ji ber ziwabûna çeman, qutbûna avê ji aliyê Tirkiyeyê ve, bandorên wê li ser çandinî, jîngehê û jiyana rojane, dike.
Li kêlek wê jî belgefîlm modeleya rêveberiya civakî ya li Rojava bi rêya komînan, koperatîfan, mala jinê û ewlehiya civakê dike.
Di belgefîlmê de hevdîtin û şahiyên şêniyan hene û tê de behsa jiyana hevbeş a di nava pêkhateyên herêmê de nexasim di navbera Kurd û Ereban de.
