Platforma Ked û Demokrasiyê ya Bahçelîevler ji bo Rojîn Kabaîş a ku li Wanê bi awayekî bi guman jiyana xwe ji dest da, li Qada Şîrînevlerê daxuyanî da. Di daxuyaniyê de pankarta “Ev ne xwekuştin, cînayet e. Çi bi Rojîn hat?” hat vekirin û dirûşmeyên “Jin jiyan azadî” û “Wê hesabê Rojîn bê pirsîn” berz kirin.
Endama Platformê Semra Demîr diyar kir ku mirina Kabaîş ji roja yekem ve xwestin wekî “xwekuştin” bidin nîşandan û lêpirsîn bi awayekî bandor nehate meşandin. Semra Demîr bal kişand ser redkirina pêşniyara lêpirsînê ya DEM Partiyê û anî ziman ku li gorî raporên Saziya Tiba Edlî îhtîmala êrîşa cinsî xurt dike.
Semra Demîr bi bîr xist ku mirina Rojîn Kabaîş ne bûyerek rêzê ye û diyar kir ku siyaseta bêcezatiyê qetilkirina jinan rewa dike. Semra Demîr li ser 25’ê Mijdarê Roja Tundiya Dijî Jinan a Navneteweyî rawestiya û xwest ku Peymana Stenbolê û Qanûna Hejmar 6284’an bi awayekî bi bandor were pêkanîn.
Semra Demîr anî ziman ku divê berpirsiyarên şeş kesên ku di şewata Dîlovasiyê de jiyana xwe ji dest dane werin darizandin û bal kişand ser girîngiya yekîtî û têkoşîna hevbeş a jin û kedkaran.
