Li Êlihê bi şîara ‘Rêbertiya Azad, Civaka Demokratîk’ Newroz hate pîrozkirin. Bi deh hezaran kes beşdarî Newrozê bûn. Tevî hewaya bi baran û sar jî gel demek dirêj govend gerand. Ji bo bîranîna şehîdên têkoşîna azadî û demokrasiyê deqeyek rêz hate girtin. Di vê navberê de bê navber dirûşmeyên “Bijî Serok Apo” û “Jin Jiyan Azadî” hatin berzkirin. Posterê Rêber Apo jî hate vekirin. Komîteya Amadekar û siyasetmedaran beşdarên pîrozbahiyê silav kirin.
Hevşaredara Êlihê ya ku wezîfeya wê hatî desteserkirin, destpêkê Newroz li Rêber Apo pîroz kir û got, gelê Kurd bi banga sedsalê re ye, bi çareseriya demokratîk re ye.
Hevşaredar Yeşîl Işik jî got, “Newroza gelê Kurdistanê û Rojhilata Navîn pîroz be.”
Alîkarê Hevserokatiya Giştî ya DEM Partiyê Tayîp Temel diyar kir ku Kurd di Newrozê de azadiya fîzîkî ya Rêber Apo dixwazin û ev tişt bilêv kir: “Em ê armanca vê bangê pêk bînin. Banga Birêz Ocalan tovê jiyanê li Kurdistanê çand. Banga Birêz Ocalan, banga yekîtiya neteweyî ye. Divê em barê Birêz Ocalan sivik bikin. Em deng bidin vê bangê. Divê em destê girtiyên siyasî xurt bikin. Îro roj roja me ye. Ev bar li ser milê we û me ye. Li ser milê gelê Kurdistanê ye.
Heta ku Birêz Ocalan azad nebe, ev pêvajo bi encam nabe. Lewma gelê Kurd azadiya Birêz Ocalan dixwaze. Ez bang li Wezîrê Edaletê dikim; gotinên xwe yên şaş, rast bikin. Yên ku li Qamişlo û Kobanê komkujiyan dikin, wê hesabê bidin vî gelî.”
Hunermend Mehmet Atli derket ser dikê û agirê Newrozê jî hate vêxistin.
