Parlamenterên Partiya Demokratîk û Wekheviyê ya Gelan (DEM Partî) ji bo binpêkirinên mafên mirovan ên li girtîgehan tespît bike û veguherîne raporê serdana girtîgehên li herêma Derya Reş kirin û bi gelek girtiyan re hevdîtin kirin. Heyetê serdana 7 girtîgehan kir ku girtîgehên li Bafra, Tokat û Rîze Kalkandere jî di nav de bûn û li ser pirsgirêk û bêhiqûqiya ku girtî pê re rû bi rû dibin rapora amade kir. Endamê heyetê Parlamenterê Çewlîgê yê DEM Partiyê Omer Farûk Hulaku li ser mijarê ji ajansa me re axivî.
Hulaku anî ziman ku di serdanên li girtîgehên li Herêma Derya Reş de wan gelek binpêkirinên mafên mirovan û tecrîd tespît kirin. Hulaku ragihand ku wan serdana girtîgehên Bafra, Çarşamba, Kavak, Beşîkduzu, Espiye, Kalkandere û Tokatê kirin û got, bi taybetî li ser pirsgirêkên ku girtî pê re rû bi rû dimînin wan guh dan girtiyan ku li girtîgehên dûrî ji malbatên xwe têne ragirtin.
HEMÛ MAF TÊNE ASTENGKIRIN!
Hulaku diyar kir ku yek ji pirsgirêkên herî zêde li girtîgehan têne bilêvkirin kiryarên desteyên çavdêrî û îdareyê ne û anî ziman ku berdana gelek girtiyan bi hincetên cuda hate taloqkirin û ev yek bû sedema mexdûriyeteke cidî. Hulaku anî ziman ku karên sportîf, çandî û civakî hatine bisînorkirin, têkiliya navbera girtiyan hatiye kêmkirin, li hin girtîgehan mercên tecrîdê hatine girankirin û got, têkildarî van kiryaran gelek gilî li wan hate kirin.
‘DERMANKIRINA GIRTIYÊN NEXWEŞ TÊ ASTENGKIRIN’
Hulaku axaftina xwe bi vî rengî dewam kir, “Li Çarşamba odeyên girtiyên siyasî ji hev gelekî têne dûrxistin, bi zanebûn mehkûmên edlî di navbera wan de têne bicihkirin û zexteke bi vî rengî ya psîkolojîk dikin. Li gel vê yekê li zindanan ‘lêgerîna li nava dev’ tê ferzkirin ku kiryarek ji şikandina rûmeta mirovan e. Girtî Dilaver Tanrikûlû û Mehmet Çagirici ku nexweşên tansiyona bilind û kronîk e, ji ber ku ev lêgerîna neheq qebûl nekirin nikarin biçin nexweşxaneyê û doktor. Mafê wan ê dermankirinê bi rengekî zalimane tê astengkirin. Ji bo têkiliya girtiyan a bi derve re bê birîn rojnameyên Yenî Yaşam û Evrenselê, her wiha qenalên TV ên muxalîf bi temamî hatine qedexekirin.”
‘JI BER KU SILAV DA, CEZAYÊ DÎSÎPLÎNÊ LÊ HATE BIRÎN’
Parlamenter Hulaku ragihand ku li girtîgehên ku wan serdana wan kir, hiqûqa dijmin tê meşandin û mînakeke bi vî rengî da: “Girtî Sefer Boran ê li Girtîgeha Espiyeyê tê ragirtin, li gel ku ti cezayê dîsîplînê lê nehatiye birîn, berdana wî 2 sal in ji aliyê desteyên çavdêrî û îdareyê ve tê astengkirin û di demeke nêz de wê cara 8’emîn derxînin pêşiya desteyê. Heman girtî ji ber ku di dema hevdîtinê de silav da hevalên xwe yên girtî yên cezayê girtîgehê yê heta bi hetayê li wan hatiye birîn, ji aliyê îdareyê ve hate cezakirin ku di hevdîtina pêş de perde li pêşiya wî bê danîn.”
‘GIRTÎ DI BIN BARANÊ DE HATIN HIŞTIN’
Hulaku got, “Li Çarşambayê jî dema ku baraneke zêde dibariya gardiyanekî girtî bi zorê derxist derve, ew bi zorê di binê baranê de hişt. Li Espiyeyê jî endamên MÎT’ê çûn gel hevrêyê me Îsa Arslan û bi zorê xwestin hevdîtina veşartî pê re bike, lê belê li ser nerazîbûna tund a hevalên din ên li koxûşan û nerazîbûna bi îradeyê, ew wezîfedar neçar man biçin. Midûrê saziya li Çarşambayê jî dema bihîst ku heyeta me wê bê, bi lez û bez ket betlaneyê, ku bi vî rengî ji berpirsyariyê bireve.”
‘EM Ê BINPÊKIRINAN BIXIN ROJEVA MECLÎSÊ’
Hulaku destnîşan kir ku li gel zextan jî girtî bi moral in û banga piştevaniyê kirin. Hulaku ragihand ku wê bûyerên qewimîn bi rengê raporê bixin rojeva meclîsê.
