Ji bo Şervanê Hêzên Sûriyeya Demokratîk (QSD) Bêkes Qamişlo (Welîd Elî) yê ku 23’yê Çileyê (2025) li Bendava Tişrînê di encama bombebarana balafira dewleta Tirk a dagirker de şehîd bûbû, li Pakrewangeha Şehîd Delîl Saroxan a li bajarê Qamişlo merasîm hat lidarxistin.
Di merasîmê de ji bilî malbat û hevalên Şehîd Bêkes, bi sedan şêniyên bajarê Qamişlo û gundewarên wê û endamên saziyên sivîl jî amade bûn.
Cenazeyê şehîd ji morga li taxa Enteriyê hat wergirtin û ji aliyê sedan kesan ve li ser milan bi meşê anîn pakrewangehê. Di meşê de wêneyên şehîd Bêkes Qamişlo hatin hildan û dirûşmeyên ku dilsoziya bi şehîdan re tînin ziman hatin berzkirin.
Piştî meşê li pakrewangehê merasîm hat lidarxistin. Di merasîma ku bi deqeyek rêzgirtinê destpê kir de Endama Meclisa Malbatên Şehîdan Cewahir Osman axivî û diyar kir ku şehîd reng û ruhê şoreşê ne.
Cewahir Osman got: “Şervanên me bi reng û ruhê şoreşgerî şer dikin û li berxwe didin. Şervanên me di van kêliyan de bi hemû hêz û cesareta xwe li dijî êrişên dewleta Tirk a dagerker li ber xwe didin û ax û welatê xwe diparêzin. Em gel û şehîdên xwe serbilind in.”
Yek ji Fermandarê Meclisa Leşkerî ya Qamişlo Nezîr Sofî jî da zanîn ku şehîdan bi têkoşîna xwe dîrokek mezin ava kiriye wiha dom kir: “Em soz didin hemû şehîdên xwe yên ji bo gel, welat û axa xwe ruhê xwe feda kirine ku em ê şopdarên xeta wan bin, em deyndarê şehîdên xwe ne.”
Endamê Kongreya Îslama Demokratîk Casir El-Salih jî destnîşan kir ku şehîd bi nirx û pîrozin, cihê wan di asta herî bilind de ye û sersaxî ji malbata şehîd Bêkes Qamişlo xwest.
Hejmarek ji hevrêyên şehîd Bêkes Qamişlo û Apê wî Hisên Elî jî li ser dika pekrewangihê axivîn û soza berdewamkirina rêya wî dan.
Piştî axaftinan wesîqeya şehadetê hat xwendin û radestî malbatê hate kirin.
Di dawiya merasîmê de heval û hogirên şehîd cenazeya wî bi dirûşmeyên, “Şehîd Namirin” spartin axê.
