Şêniyên li bajarê Qamişlo û koçberên ji Efrînê yên ku li bajêr dimînin bi merasîmekê li Pekrewangeha Şehîd Delîl Sarûxan a li bajarê Qamişlo cenazeyên Endamê Hêzên Ewlekariya Hundirîn Mihemed Mustefa (Amed) ê ku 26`ê Adarê li Bendava Tişrîn û Şervanê Hêzên Sûriyeya Demokratîk (QSD) Gara Qamişlo (Îbrahîm El Îbrahîm) ê ku 28`ê Adarê li Dêr Hafirê şehîd bûne veşartin.
Merasîma oxirkirinê bi torana leşkerî ya Hêzên Operasyonê yê girêdayî Hêzên Ewlekariya Hundirîn û bi deqeyeke rêzgirtin dest pê kir.
Endama Meclisa Malbatên Şehîdan Fatima El Casim axivî û sersaxî ji malbatên her du şehîdan xwest. Fatima bal kişand ser qehremanî û têkoşîna Şehîd Gara Qamişlo û wiha got: “Ew ji malbatên yekemîne ku tevlî nava refên şoreşê bûn, sala 2015`an şervanê YPG`ê bû.”
`EM Ê TOLA ŞEHÎDÊN XWE HILÎNIN`
Yek ji fermandarên Meclisa Qamişlo ya Leşkerî Macid Qamişlo jî axivî û destnîşan kir ku ew di rojên cejinan de jî şehîdên xwe oxir dikin û bal kişand ser xerabkirina pekrewangehên şehîdan ji aliyê çeteyên girêdayî dewleta Tirk a dagirker ve û got: “Em wan sûcdar dibînin, ev kiryar kiryarên tirsonekan e. Çi qas dem û ked ji me bê xwestin em ê her tola şehîdên xwe hilînin.”
`EM Ê BIGHÊJIN SERKEFTINA HERÎ MEZIN`
Yek ji Fermandarên Hêzên Ewlekariya Hundirîn a Bakur û Rojhilatê Sûriyeyê Buhar Îbrahîm di axaftina xwe de da xuyakirin ku şehîd Mihemed Mustefa (Amed) di jiyana xwe de her di nava têkoşînê de bû, bi salan li Efrîn xebat da meşandin û heta roja îro ku gihaşt asta şehadetê û wiha got: “Ti kes nikare hêza me bişkîne, em ê bighêjin serkeftina herî mezin û em ê her li pey şopa şehîdên xwe bin.”
`BI DIL Û BAWERÎ ŞER DIKIN`
Endamê Kongra Îslama Demokratîk Casir El Salih jî axivî û da zanîn ku her du şehîd di dawiya meha Remezanê şehîd bûne, di her şerekî de şervanên me bi dil û baweriya xwe xebata xwe didin meşandin. Ew bi çekê şer nakin, ew bi bawerî û dil parastinê dikin.
Piştî xwendina wesîqeyên her du şehîdan, birayê Şehîd Gara Qamişlo, Zagros Tebqa jî axivî û ev tişt anî ziman: “Biyarê me şehîd bû, 4 kurên wî şervan in, wê li pey doza bavê xwe bin.”
Birayê Şehîd Mihemed Mustefa Mecîd Mustefa jî axivî û da zanîn ku ew ê her li pey şopa birayê xwe bin û daxwaz ji rêhevalên şehîd kir ku rêya wî bişopînin.
Piştre Birayeke din ê Şehîd Mihemed Mustefa, yê bi navê Sibhî Mustefa çeka birayê xwe rakir û soza tevlîbûna nava hêzên leşkerî da.
Piştî qedandina merasîmê oxirkirinê, rêheval û malbatên şehîdan cenazeyê Şehîd Mihemed Mustefa li Pekrewangeha Şehîd Delîl Sarûxan a li bajarê Qamişlo û cenzeyê Şehîd Gara Qamişlo (Îbrahîm El-Îbrahîm) li Pekrewangeha Şehîd Dilşêr a girêdayî bajarê Tirbespiyê veşartin.
