Desteserkirina Şaredariya Bajarê Mezin a Wanê li gelek bajaran hat protestokirin. Di çalakiyan de hat destnîşankirin ku têkoşîna li dijî qeyûman wê bidome.
ENQERE
Partiya Wekhevî û Demokrasiyê ya Gelan (DEM Partî) a Enqereyê li dijî desteserkirina vîna gelê Wanê li kolana Sakarya ya navçeya Çankayayê daxuyanî da çapemeniyê. Parlamenterê DEM Partiyê Huseyîn Olan, Hevserokê Konfederasyona Sendîkayên Kedkarên Cemaweriyê (KESK) Ahmet Karagoz, gelek nûnerên saziyên sivîl, partiyên siyasî û gel beşdarî daxuyaniyê bûn.
Di çalakiyê de bê navber dirûşmeyên “Qeyûm wê biçin, em ê bimînin” û “Qeyûm ji Kurdistanê de biciheme” berz kirin. Rêvebera DEM Partiyê ya Enqereyê Nebahat Çalpan daxuyanî da.
Nebahat Çalpan diyar kir ku desthilat polîtîkayên xwe li ser dijminatiya vîna gel ava kiriye û got, “Di vê serdema ku hêviya aştiyê di nava gelê me de mezin bûye, şaredariya me bi operasyona leşkerî tê dagirkirin. Bi bombeyên gazê û guleyên plastîk êrîşî şaredariya me kirin. Zêdeyî 100 welatiyên me bi lêdanê binçav kirin. Dagirkirina Şaredariya Bajarê Mezin a Wanê darbeya li vîna gel e û di heman demê de israrkirina polîtîkayên şer û hiqûqa dijminatiyê ye. Me duh li Wanê bi gelê xwe re li ber xwe da û bi ser ketin, îro jî em ê li ber xwe bidin û bi ser bikevin.”
ÎZMÎR
Hêzên Ked û Demokrasiyê yên Îzmîrê jî têkildarî astengkirina çalakiya karkerên li Herêma Pîşesazî ya Organîze ya Başpinarê ya Dîlokê û desteserkirina Şaredariya Bajarê Mezin a Wanê daxuyanî da çapemeniyê.
Daxuyanî li ber Navenda Çandê ya Turkan Saylan hat dayîn. Parlamenterên DEM Partiyê yên Îzmîrê Burcugul Çubuk û Îbrahîm Akin, rêxistinên demokratîk, partiyên siyasî û gelek kes beşdarî daxuyaniyê bûn. Di çalakiyê de pankartên “Qedexe, zext, avêtina ji kar, têkoşîn, yekîtî, hevgirtin ên me ne!” û “Dest nede vîna min, em ê rê nedin qeyûman” hatin hilgirtin.
Alîkara Serokê Baroya Îzmîrê Zohre Dalkiran daxuyanî xwend. Zohre Dalkiran diyar kir ku desthilatdar tehemulî maf û azadiya çîna karkeran nake û wiha got: “Kedkar dixwazin mafên xwe yên destûra bingehîn, hiqûqa navneteweyî û qanûnên xwecihî bi kar bînin. Em weke Hêzên Demokrasî û Kedê yên Îzmîrê daxwaz dikin ku Walîtiya Dîlokê demildest dawî li qedexeyên derqanûnî û astegiyên danîne pêşiya karkeran bîne. Pêwîste demildest dev ji derbeya qeyûman a li dijî vîna gel bê berdan.”
