Komîsyona Hiqûq û Mafê Mirovan a Partiya Wekhevî û Demokrasiyê ya Gelan (DEM Partî), bi boneya salvegera 2’yemîn a biryarên Doza Kobanê, li ber Girtîgeha Sîncanê ya Enqereyê daxuyanî da. Serokwekîla Koma DEM Partiyê Gulistan Kiliç Koçyîgît, Hevberdevkê Komîsyona Hiqûq û Mafê mirovan a DEM Partiyê Ozturk Turkdogan, parlamenterên DEM Partiyê, rêveberên rêxistinên DEM Partiyê yên Enqereyê û endam û nûnerên saziyên demokratîk tev li daxuyaniyê bûn. Di daxuyaniyê de pankarta li ser “Divê girtiyên Doza Kobanê bên berdan” hate hilgirtin. Girseyê dirûşma “Girtiyên Doza Kobanê rûmeta me ne” berz kir.
‘DOZA KOMPASÊ YE’
Ozturk Turkdogan di daxuyaniyê de îşaret bi salvegera derbeya siyasî ya 4’ê Mijdara 2016’an a li dijî HDP’ê kir û got: “Du sal bi ser biryarên Doza Kobanê re derbas bûn. Hê jî 14 hevalên me bi biryarên sîyasî girtî ne. Di 2014’an de lêpirsin hat vekirin û cardin hat girtin. Piştî ev dosya hat girtin li Tirkiyeyê hin geşedan pêk hatin. Hewldana derbeyê çêbû, destûra bingehîn hat guhertin. Di 2020’an de bi lêzgînî lêpirsîn di Doza Kobanê de hat destpêkirin. Em ji vê dozê weke doza kompasê bi nav dikin. Dadgeha Mafên mirovan ya Ewropayê (DMME) der barê berdanê de biryar da. Hevalên me bi îdiayên kuştin û talanê hatin tawanbarkirin lê ji van tevan beraet kirin. Tenê ji ber parvekirinên medyaya civakî hatin cezakirin. Ew girtin bê hiqûqî ye. Divê biryarên DMME’yê bicih bînin û hevalên me berdin.”
‘HEKE ARMANC AŞTÎ BE WÊ DEMÊ ÇIMA HEVALÊN ME NAYÊN BERDAN?’
Serokwekîla Koma DEM Partiyê Gulistan Kiliç Koçyîgît jî anî ziman ku ji bo pêşî li pêşketina HDP’ê were girtin ev doz hatiyê vekirin û wiha got: “Xwestin di qada siyaseta demokratîk de HDP’ê tune bikin. Armanca sereke ya vê dozê girtina HDP’ê bû. Di Doza Kobanê de gelek biryarên DMME’yê hene. Girtina hevalên me bi awayekî bêhiqûqî didome. Edî pêvajoyeke nû dest pê kiriye. Em li ser çarêseriya demokratîk diaxivîn. Heke armanca me aştî be wê demê çima hevalên me hêj girtî ne û nayên berdan? Heta Selahattîn Demîrtaş û Fîgen Yuksekdag neyên berdan aştî nikare bê vî welatî. Gelo heta hemû girtiyên siyasî û girtiyên nexweş neyên berdan dê aştî çawa bibe? Divê her kes li gorî vê pêvajoyê tevbigerê. Berpirsyariyên xwe bi cih bînin.”
Daxuyanî bi berzkirina dirûşman bi dawî bû.
