10 partiyên Kurdan ên Rojava daxuyaniyeke hevbeş da û nerazîbûn nîşanî destnîşankirina 4 kursiyan ji bo nûnertiya Kurdan di Meclisa Gel a Sûriyeyê de da.
Di daxuyaniyê de hate gotin “Di demekê de ku pêkhateyên Sûriyeyê li bendê ne ku dewleteke hemwelatîbûn û şirîkatiyeke rastîn ava bikin, her wiha rêyeke siyasî ya giştî peyda bikin ku dawî li bi dehan salên marjînalbûnê bîne, gelê me bi ‘hilbijartinên Meclisa Gel a Sûriyeyê’ şok bû.”
Di daxuyaniyê de “tayînkirinên di bin navê hilbijartinên Meclisa Gel a Sûriyeyê” hat rexnekirin û hate destnîşankirin ku tayînkirinên bi vî rengî nûnertiya îradeya sûriyeyan nake, di heman demê de siyasetên nijadî, dûrxistin û paşguhkirinê yên li dijî Kurdan dubare dike.
Di dewama daxuyaniyê de îşaret bi vê yekê hat kirin ku “sînordarkirina nûnertiya Kurdan bi 4 kursiyên lawaz ji nav 210 kursiyên Meclisa Gel, xapandineke aşkere ye li ser rastiyên demografî û siyasî yên li ser erdê ye. Gelê Kurd li Rojavayê Kurdistanê pêkhateyeke resen û dîrokî ye û rêjeya wî ji sedî ne ne kêmî ji sedî 20’ê tevahiya nifûsa Sûriyeyê ye, îro bi rêya van tayînkirinên sîstematîk ji dengê xwe yê rastîn û mafê xwe yê parvekirî di biryardana nîştimanî de bê par tê hiştin.
Li ser vê bingehê em van tayînkirinan bi her awayî red dikin. Em mekanîzmaya dabeşkirina niha wekî berdewamiya siyasetên marjînalbûnê (peravêkirina) nijadperest dibînin ku armanca wan windakirina doza Kurdî ye.
Em pêwîstî bi mafê xwe yê nûnertiya rastîn a parlamenî dibînin ku ne kêmtirî 40 kursiyan be ji bo kesên ku bi awayekî zelal xwedî ramanên neteweyî yên kurdî ne û doza wî ya dadperwer diparêzin, ev yek jî li gorî rêjeya nifûsa rastîn a pêkhateya Kurd e.”
Di daxuyaniyê de hate gotin: “Qebûlkirina çespandina van çar kursiyên lawaz dê bibe mînakeke dîrokî ya pir xeternak; ji ber ku dê bandorek xerab li parên Kurdan di hemû saziyên dewletê de; serwerî, wezaret, saziyên dadwerî û dîplomatîk de bike.”
Her wiha hate diyarkirin ku tayînkirinên bi vî rengî xizmeta daxwazên gelê Kurd nake û hate gotin “dê têkoşîna xwe ya aştiyane û dîplomatîk, bi hevkariya hemû hêzên demokratîk ên Sûriyeyê re berdewam bikin, ta ku şirîkatiyeke nîştimanî ya rastîn û destûreke nûjen ku mafên neteweyî yên rewa yên gelê Kurd û hemû pêkhateyên Sûriyeyê nas bike pêk were.”
Partiyên daxuyanî daye ev in:
– Partiya Lîberal a Kurd li Sûriyê
– Partiya Kesk a Demokrat
– Partiya Hevpeymaniya Demokratîk a Kurdî ya Sûrî
– Partiya Komunîst a Kurdistanê
– Partiya Demokrat a Kurdistanê – Sûriyê
– Partiya Guhertina Demokratîk a Kurdistanê
– Partiya Kombûna Nîştimanî ya Kurdistanê
– Partiya Parêzgeran a Kurdistanê
– Partiya Roj a Demokratîk a Kurd li Sûriyê
– Tevgera Nûjen a Kurdistanê.
