Meclîsa Dayikên Aştiyê ya Amedê têkildarî banga ‘Aştî û Civaka Demokratîk’ a Rêber Apo daxuyaniyek da çapemeniyê. Havva Kiran ewil diyar kir ku pêvajoya aştiyê piştî peyama Rêber Apo ya di 27’ê Sibatê de destpê kir. Havva Kiran diyar kir ku bi destpêkirina pêvajoyê re weke Dayikên Aştiyê piştgiriyê didin pêvajoyê û got, “Em dibêjin bila aştî were van xakan. Em bang li her kesî dikin, ne rast e şer tenê li aliyekî raweste, pêwîste her du alî çekan deynin. Ji Rojava heta Başûrê divê li her derê şer raweste. Li cihên ku şer lê heye kulîlk nayên çandin. Her kesê ku ji xwe re dibêje mirov divê ji bo rawestandina vê xwînrijandinê gavan biavêje û her kes berpirsyariya xwe bigire ser milê xwe.
RIHA
Meclîsa Dayikên Aştiyê ya Rihayê, têkildarî banga Rêber Apo ya “Aştî û Civaka Demokratîk” li ber avahiya Partiya Demokrasî û Wekheviyê ya Gelan (DEM Partî) ya Rihayê daxuyaniyeke çapemeniyê da.
Dayika Aştiyê Adalet Çay di daxuyaniyê de axivî û got, “Ev 2 roj in deriyên pêvajoyeke nû hatine vekirin. Banga me ji hemû dayikan re ev e, werin em bi hev re dev ji vê xwînê berdin. Divê dewlet jî gavan bavêje. Şer û agirbest ne yek alî ye. Em êdî naxwazin dayik bigirîn û ciwan bimirin. Bila şer raweste. Bila zindan vala bibin. Bila diyalog hebe. Em bang li hemû cîhanê dikin, bila dengê dayikan bibihîzin. Em destê xwe dirêjî aştiyê dikin. Divê gav bên avêtin. Divê êdî balafirên şer ranebin, top bên rawestandin. Ji bo rawestandina xwînê çi hewce dike bikin. Eger navnîşan parlamento be, divê li wir diyalog bên kirin.”
Dayika Aştiyê Meyaser Korkmaz diyar kir ku bi salan e aştiyê dixwazin û got, “Em di pêvajoyeke nêzî aştiyê re derbas dibin. Agirbesteke yekalî nîne, divê aliyê din agirbestê ragihîne. Em êdî mirin û xwînê naxwazin. Em jiyan û aştiyê dixwazin. Hemû dayik dilşikestî ne. Divê dayikên leşker jî xwedî li agirbestê derkevin û banga agirbestê bikin. Em dibêjin êdî bes e. Bi salan e em berdêla wê didin. Me zarokên xwe winda kirin, bila em vê carê neviyên xwe winda nekin. Ji şer re na, ji aştiyê re erê.”
Daxuyanî bi çepik û qîrîna dirûşmên “Ne şer aştî niha” bi dawî bû.
MERSÎN
Meclîsa Dayikên Aştiyê ya Mersînê jî li ber avahiya Rêxistina DEM Partiyê ya navçeya Akdenîzê daxuyaniyek da çapemeniyê. Li gel dayikên aştiyê Parlamentera DEM Partiyê Perîhan Koca jî tevlî daxuyaniyê bû. Emîne Eren daxuyanî da û spasiya her kesî kir ên ku piştgiriyê didin aştiyê û gavê diavêjin. Emîne Eren got, “Em aştiyê dixwazin. Bila dayikên polîs, leşker, Kurd, kes negirî. Rengê rondikên çavan ên dayikan weke hev e.”
Tenzîle Baydar jî diyar kir ku ew di vê pêvajoyê de samîmiyetê dixwazin û divê dewlet ji bo aştiyê şert û mercên pêwîst biafirîne.
