Girtiyên siyasî di çerçoveya pêngava “Ji Abdullah Ocalan re azadî, ji pirsgirêka Kurd re çareseriya siyasî” di 27’ê Mijdara 2023’yan de dest bi greve birçîbûnê kiribûn û çalakiya wan di roja 71’an de berdewam dike. Nobeta Edaletê ya malbatê girtiyan a ku li avahiya Partiya Wekhevî û Demokrasiyê ya Gelan (DEM Partî) a Rezan a Amedê bi pêşengtiya Komeleya Piştevaniya bi Malbatên Girtiyan re (TUAY-DER) di 4’ê Kanûna 2023’yan hatiye destpêkirin jî di roja 64’an de berdewam dike. Dayikên di nobetê de ji bo şikandina tecrîdê bang li raya giştî kirin û Meşa Azadiyê silav kirin.
‘EM DIXWAZIN AGAHÎ JI ABDULLAH OCALAN BIGIRIN’
Yek ji Rêvebera DBP’ê yê Amedê Muşeher Ulker ku bi dayikan re nobetê digire, diyar kir ku ew dixwazin agahî ji Rêberê Gelê Kurd Abdullah Ocalan bigirin û got, “Em dixwazin hîn bibin ka rewşa wî baş e an na. Ev yek mafê me ye. Ulker got, “Rêberê me li Îmraliyê di bin tecrîdê de ye û ji ber vê yekê ez li vê derê di nobedê de me. Tecrîda li ser wî di rastiyê de li ser me hemûyan e. Îro dayik hem li dijî tecrîdê hem jî ji bo dengê zarokên xwe bidin bihîstin nobetê digirin. Hemû kesên ku mirovahiyê diparêzin divê li dijî vê tecrîdê derkevin. Îro, tecrîd ketiye nava malên me. Divê ev tecrîd bi dawî bibe. Dayik êdî xwe di nava tecrîdê de hîs dikin. Wezîrê Dadê ango Serokkomar kî be muxatab divê guh bide banga dayikan. Tecrîd sûc e, em dixwazin ji Birêz Ocalan agahî bigirin, em azadiya Birêz Ocalan dixwazin.”
MEŞA MIROVAHÎ Û EDALETÊ
Ulker, behsa girîngiya Meşa Azadiyê ya ku di 1’ê Sibatê de destpêkiriye kir û wiha domand, “Ji du başkan ve ber bi Amedê ve dimeşin. Ev meş meşa mirovahiyê ye, meşa edaletê ye, meşa azadî û aştiyê ye. Ev meş ji bo ku dayik negirîn e. Ev meş ji bo em agahî ji Rêbertî bigirin û bidawîkirina tecrîdê ye. Her wiha divê tecrîda li ser girtiyên ku li Girava Imraliyê bi Rêbertî re ne were rakirin. Dê û bavên wan bi salan e zarokên xwe nedîtine û ne jî dengê wan bihîstine. Ev tecrîd nayê qebûlkirin. Divê êdî dayik êşê nekişînin, bila dilê wan neşewite. Em di wê baweriyê de ne ku wê meş bi ser bikeve. Bila rêya hevrêyên me vekirî be. Ev meş girîng e. Em dixwazin di zûtirîn demê de ji Îmraliyê agahî bigirin. Ev meş wê bibe wesîle. Divê tevahiya gelê Kurd bi coşeke mezin meşvanan pêşwazî bike. Divê her kes xwedî li vê meşê derkeve.”
BANG JI BO DAYIKÊN GIRTIYAN: DI NOBETÊ DE BIMÎNIN
Dayika Mahsûn Sarûhan ê li Girtîgeha Tekîrdagê girtî ye Sulhiye Sarûhan, destnîşan kir ku divê her kes xwedî li Nobeta Edaletê ya ku bi heftiyan dewam dike derkeve. Sarûhan, anî ziman ku tenê daxwaza wan bidawîbûna tecrîdê ye û wiha got, “Em dixwazin ev tecrîda li ser hemû gelê Kurd û girtîgehan bê rakirin. Ya rast, tecrîda ku di şexsê Birêz Ocalan de li Îmraliyê hatiye girankirin, li ser tevahiya civakê girantir bûye. Heke tecrîda li Îmraliyê rabe wê zexta li ser civakê jî rabe. Her tiştê ku em îro dijîn tecrîd e. Gelek zext hene. Tecrîd bandorê li her kesî dike. Ji ber vê yekê divê her kes li dij derkeve. Tişta ku em dayik dixwazin aştî û edalet e. Em dixwazin her kes dengê me bibihîze, em dixwazin hemû dayikên girtiyan werin vê nobetê û dengê zarokên xwe bidin bihîstin. Eger em îro li dijî tecrîdê dengê xwe dernexin, sibe em ê nikaribin li rûyê zarokên xwe binêrin.”
‘EM Ê LI AMEDÊ MEŞVANAN BI COŞEK MEZIN PÊŞWAZÎ BIKIN’
Sarûhan, da xuyakirin ku çalakiyên li dijî tecrîdê hatine destpêkirin girîng in û da zanîn ku, dayik dengê van çalakiyan didin bihîstandin û wiha dom kir, “Ew jî, ji bo edalet, yekîtî, hevgirtin û aştiyê dimeşin. Di şert û mercên zehmet yên zivistanê de, di nava berf û qiyametê de ji bo dawî li tecrîdê bînin dimeşin. 13’ê Sibatê wê bigihêjin Amedê û em ê wan li vir bi coşeke mezin pêşwazî bikin. Ev meş deng vedide û wê bi xwe re bîne. Em li vir li cihekî girtî nobetê digirin, lê her kes wan dibîne, her kes wan dibihîze. Wê ji çalakiya me zêdetir deng derxe. Eger hewa xweş bûya em ê li kolanan bûna, lê belê dayikên me yên nexweş hene, nikarin li ber serma kolanê bisekinin. Ji ber vê yekê em li vir li hundir nobetê digirin. Lê ev meş wê dengê me bide bihîstin. Ez careke din tecrîdê ji vir şermezar dikim. Ez komploya 15’ê Sibatê jî protesto dikim. Komplo li dijî tevahiya gelê Kurd hatiye kirin. Em vê komployê şermezar dikin, ji bo me 15’ê Sibatê rojeke reş e.”
