Rêxistina Bajarê Stenbolê ya Partiya Wekhevî û Demokrasiyê ya Gelan (DEM Parti) û pêkhateyên wê, piştî biryara “bêhukmiya teqez” serdana Serokatiya Bajarê Stenbolê ya CHP’ê kir. Di serdanê de parlamenterên DEM Partiyê û Hevserokên Bajarê Stenbolê Arîfe Çinar û Çinar Altan cih girtin.
Şandeya DEM Partiyê ji aliyê Serokê Bajarê Stenbolê yê CHP’ê Ozgur Çelîk û endamên partiyê ve hat pêşwazîkirin. Çelîk diyar kir ku ew ê li deverên cuda yên Stenbolê çalakî û bernameyan li dar bixin, ji bo serdanê spasiya şandeya DEM Partiyê kir û wisa got: Pirsgirêk ne tenê CHP ye. Pirsgirêk, pirsgirêka demokrasî, dad û pergala makezagonî ye.
Hevseroka Bajarê Stenbolê ya DEM Partiyê Arîfe Çinar jî destnîşan kir ku Tirkiye di pêvajoyeke dîrokî re derbas dibe û anî ziman ku desthilatdarî ev demeke dirêj e hewl dide dengê opozîsyonê bibire.
Çinar da zanîn ku ew vê helwesta li hemberî CHP’ê napejirînin û wisa got: Îro em bi Tirkiyeyekê re rû bi rû ne ku tê de derbasdariya hilbijartinan û kongreyên partiyên siyasî tê nîqaşkirin. Em ê li dijî zextên desthilatdariyê yên li ser partiyên siyasî bi hev re têbikoşin.
Çinar diyar kir ku ev serdan di heman demê de bi armanca piştgiriye ye û ew ê têkoşîna xwe bi awayekî hevpar bidomînin.
