Parêzerên rojnameger û parastvanê jiyanê Hakan Tosun, ê ku li Esenyurta Stenbolê dema diçû serdana diya xwe bi lêdanê hatibû qetilkirin, li Şaxa Komeleya Mafên Mirovan (ÎHD) ya Stenbolê der barê lêpirsîna kuştinê de civîneke çapemeniyê li dar xistin. Di civînê de xwişka Hakan Tosun, Oznur Tosun û gelek nûnerên saziyên çapemeniyê amade bûn.
Parêzerê malbatê Cemal Yucel der barê qonaxa lêpirsînê de agahî dan û destnîşan kir ku di fezlekeya ku ji aliyê Dozgerê Komarê yê Buyukçekmeceyê ve hatî amadekirin de, bersûcên girtî Abdurrahman Murat û Adnan Şahin hatine pakkirin.
FEZLEKE BI SÛCÊ “BIRÎNDARKIRINA GIRAN” HATE AMADEKIRIN
Yucel bal kişand ser wê yekê ku tevî Hakan Tosun bi derbên lêdan bi qestî hatibe kuştin jî, dozger li şûna sûcê “bi qestî kuştina mirov”, bi sûcê “birîndarkirina giran a ku bûye sedema encamê” fezleke amade kiriye.
Yucel diyar kir ku heger ev fezleke ji aliyê Serdozgeriya Komarê ya Bakirkoyê ve bibe îdianame, dibe ku her du bersûc tenê bi 2,5 salan werin cezakirin û serbest werin berdan.
Yucel wiha got: “Weke ku hûn jî dizanin, Hakan Tosun ji aliyê çeteyekê ve bi lêdanên giran hat qetilkirin. Lê belê dozger, wekî ku parêzerê bersûcan be tevgeriyaye û fezlekeyeke ku her du bersûcan pak dike amade kiriye. Ev nayê qebûlkirin. Heger dîmenên kamerayan di destê me de neban, dibe ku îdîayên bêbingeh wekî rastî hatiban qebûlkirin. Lê belê qeydên kamerayan hene û di rapora Tiba Edlî de jî hatiye piştrastkirin ku mirina Hakan Tosun ji ber şikestina hestiyên serî û rû, xwînrêjiya mêjî û xerabûna tevna mêjî ya ji ber lêdanê pêk hatiye.”
Yucel her wiha got ku dozger bi vê jî nemaye li ser îdîaya ku Hakan Tosun heqaret li êrîşkeran kiriye, xwestiye ku hukmên “tehrika neheq” werin sepandin. Yucel anî ziman ku îfadeya Yusuf Ozakdag ê ku tevî êrîşê bûye lê wekî “şahid” hatiye guhdarîkirin hatiye girtin, lê di dîmenan de xuya dike ku Hakan Tosun tu heqaretek nekiriye.
GUMANA ME HEYE KU POLÎS ŞAHIDAN ARASTE DIKIN DI GOTINÊN WAN DE
Yucel wiha berdewam kir: “Gumanên me hene ku peywirdarên Amirtiya Polîsan a Mevlana ya Esenyurtê, yên ku ji serî de bi dilê kujeran tevgeriyan û delîl kom nekirin, şahidan araste dikin. Daxwazên me yên ji bo lêkolînkirina kesên li pişt kujeran û tespîtkirina kesên teşwîqkar ji aliyê dozgeriyê ve nehatine qebûlkirin. Qeydên telefonê (HTS) yên gumanbaran nehatine lêkolînkirin. Em ê ji bo parastina mafê Hakan Tosun serî li hemû rêyên hiqûqî bidin. Em hişyariyê didin; divê meqamên darazê kesî teşwîqê kuştinê nekin.”
