Endamê Yekîtiya Parêzeran a Kantona Cizîrê û Hevserokê Înîsiyatîfa Parêzerên Sûriyeyê ya ji bo Parastina Rêber Abdullah Ocalan Mihemed El Neîmî têkildarî tecrîda li Îmraliyê û mafê hêviyê ji ANF’ê re axivî.
Mihemed Elî Neîmî di destpêka axaftina xwe de wiha got: “Mafê hêviyê mafek herî rewa ye di zagonên hiqûqî yên navdewletî. Bi taybetî li gor pîvana mafê mirovan ya Ewropayê ya ku di sala 1950’î de di xala wê ya 3 de tê gotin, nabe kes were êşkencekirin û mafê hêviyê mafekî herî sereke ye ji bo her mirovekî. Lê belê dewleta Tirk a ku qaşo tevahî zagonên hiqûqî pêk tîne, ew bi xwe li dijî van zagonan derdikeve û mafê hêviyê li ser Rêbre Abdullah Ocalan qut kiriye.”
Mihemed El Neîmî got, “Dema ku Rêber Apo derket bi armanca ku gelekî ji qirkirinê xilas bike û rêya rast nîşanî her kesî bide dest bi têkoşînê kir. Lê belê ev yek li dijminan xweş nehat û hemî bipêkirinên mafê mirovan li ser Rêber Abdullah Ocalan bi kar anîn. Her wiha ez dikarim bêjim ku revandina Rêber Apo sûcek herî mezin bû di zagonên mafê mirovan de. Li beramberî vê yekê jî hemû mafê Rêber Abdullah Ocalan hatin binpêkirin û tecrîdek giran li ser Rêber Apo hat ferz kirin.”
Mihemed El Neîmî di nav axaftina xwe de destnîşan kir ku “Ji bo ku dewleta Tirk xwe li hember van kiryarên qirêj sûcdar dernexe, cezayên disiplînî li ser Rêber Abdullah Ocalan pêk anî. Di nav zagonên hiqûqî yên dewleta Tirk bi xwe dibêjin dema kesê girtî 23 salên wî deqede, mafê hêviyê jê re tê xurtkirin. Lê belê vê yekê pêk nayîne û ev 26 salên Rêber Apo di zindanê de ye lê belê dewleta Tirk ti gav ji bo mafê hêviyê ne avêtiye.”
Mihemed El Neîmî di dewama axaftina xwe de diyar kir ku Rêber Apo xwedî maf e ku azad bibe û di nav gelê xwe de jiyana xwe bidomîne û wiha pêde çû: “Rêber Apo bi temenê xwe gihiştiye 76 salî û ev yek li gor zagonên navneteweyî pêwîste azad bibe. Dewleta Tirk bi van kiryarên qirêj barê xwe giran dike ji ber ku mafê Rêber Apo ya azadiyê heye. Pêwîste dewleta Tirk xwe sererast bike û li gor zagonên navnetwî tevbigere.”
Mihemed El Neîmî anî ziman ku gelê Kurd bi xwe di gelek êş û azaran re derbas bûn, gelê Kurd ne li dijî ti kesî ne û şerê kesekî nakin, lê belê dewleta Tirk ev kîn xistiye dilê xwe û bi her awayî dixwaze wan tune bike û got: “Di kesayetê Rêber Apo de dixwaze gelê Kurd têk bibe. Ji ber dizane Rêber Apo ronahiya gelê Kurd e. Di hema demê de yek ji sûcên ku kirine qutkirna pêwendiya bi Rêber Apo re. Ev yek di zagonên mafê mirovan de nayê qebûl kirin ji ber ku kesê girtî mafê wî heye ku bi malbat û parêzerê xwe re pêwendîdar be. Bi taybet li gor xala 7 ya pergala Roma di sala 1998‘an dibe sûcek li dijî mafê mirovan û pêwîste kesê bi vî sucî rabûyî were ceza kirin. Ji ber vê yekê jî kesê ku Rêber Apo êşkence dike û mafê Rêber Apo binpê dike, pêwîste di dadgehên navdewletî de werin ceza kirin.”
Mihemed El Neîmî got ku divê ev komîteyên girêdayî mafê mirovan bi erka xwe rabin û sûcên ku dewleta Tirk dike belge bikin û bi vî rengî dewam kir, “Her tim liv û tevgera me dewam e, lê belê tevgera van komîteyên mafê mirovan jî girîng e. Pêwste ev komîte hemû sûcên dewleta Tirk derxînin da ku Rêber Apo azad bibe.”
Mihemed El Neîmî diyar kir ku Rêber Apo bi peyamekê cîhan hemû xist nav tevgerê, ji ber ku Rêber Apo rêberê mirovahiyê ye û got: “Rêber Apo di peyama xwe de anî ziman ku ew daxwaza civakek demokrasî û aştî dike. Bi vê peyamê dewletên cîhanî pêwîste bi erka xwe rabin û mafê hêviyê xurt bikin da ku Rêber Abdullha Ocalan azad bibe. Mafê hêviyê ji mafê Rêber Apo yê esasî ye. Ez wek parêzerekî xwedî edalet dibêjin ku ti sucê Rêber Apo tune ne ji ber Rêber Apo daxwaza aştiyê kiriye ne daxwaza şer kiriye.”
Mihemed El Neîmî hêviya xwe wiha anî ziman û got: “Bila êdî CPT bi erka xwe ya mirovî rabe û Rêber Apo azad bibe. Di her zagonên hiqûqî û mirovî de girtina Rêber Apo sûceke lê belê kes ji van rêxistinên mafê mirovan dengê xwe nakin. Lê em ji van rêxistinan re dibêjin ku êdî ji bêmafiya di derheqê Rêber Apo de tê kirin bes e.”
