Çalakiya nobetê ya li Wargeha Penaberan a Şehîd Rûstem Cûdî (Mexmûr) di 20’ê Tîrmeha 2023’an de ji bo azadiya fîzîkî ya Rêber Apo hat destpêkirin, di roja 1025’an de bi koma 199’an de jî bi biryardariyek xurt didome.
Merasîma dewir girtina çalakiya nobetê ku li navenda Saziya Malbatên Şehîdan a Mexmûrê lidar ket, endam û rêveberên saziyên civakî û gelek şêniyên wargehê amade bûn.
Piştî deqeyek rêzgirtin li ser navê koma 198’emîn Hevşaredarê Mexmûrê Cuma Bilihî axivî.
Cuma Bilihî bal kişand ser pêvajoya dawî ku bi banga ‘Aşîtî û Civaka Demokratîk’ ya ku ji aliyê Rêber Apo ve hatibû destpêkirin û bang li hemû saziyên mafên mirovan kir da ku pêvajo bigjhêje serî, bi erkên xwe rabin.
Cuma Bilihî destnîşan kir ku di israr kirina azadiya fizîkî ya Rêber Apo de, di azadî, wekhevî û pêkve jiyanê de israr kirin e.
Cuma Bilihî di berdewamiya axaftina xwe de wiha got: “Ji bo ku gelên Rojhilata Navîn bi hev re jiyan bikin, pêwîstî bi çareseriya pêvajoyê heye ku ew jî bi azadiya fizîkî ya Rêber Apo ve pêkane. Ji bo wê jî pêwîste ji bo azadiya fizîkî ya Rêber Apo, çi ji destê kî/kê tê, bike.”
Cuma Bilîhî di dawiya axaftina xwe de bibîr xist ku weke gelê Wargeha Mexûrê ji sala 1998’an ve li derdora Rêber Apo bûne xelek û diyar kir ku wê ji bo azadiya fizîkî ya Rêber Apo jî çalakiyên wan berdewam bikin û wê heya dawî jî wê di vê têkoşînê de israr bikin.
