Li Brîtanyayê Partiya Karker a bi serokatiya Keir Starmer ku nêzîkî du sal in li ser desthilatdariyê ye, bi hilbijartineke cidî re rû bi rû ye. Bi mîlyonan kes di hilbijartinên xwecihî yên ku îro dest pê kirin de, deng didin. Anket nîşan didin ku Partiya Karker dikare dengan winda bike.
Partiya Karkeran di sala 2024’an de li cihê Muhafezekaran ku 14 sal desthilatdar bû, hat hilbijartin. Lê belê, ji ber pirsgirêkên aborî û lêçûna bilind a jiyanê nerazîbûn li dijî hikûmetê zêde bûn. Her wiha şerê li Rojhilata Navîn, ku bûne sedema bilindbûna bihayên enerjî û xwarinê jî nerazîbûn zêdetir kirine.
Li seranserê Brîtanyayê ji bo bêhtirî 5 hezar kursiyên hikûmeta xwecihî deng tên dayîn. Her wiha ji bo parlamenta Wales û Skotlandê jî sindoq hatin danîn.
REFORM UK Û KESKAN LI PÊŞ IN
Li gorî anketan, Partiya Karker dikare li Brîtanyayê nêzîkî 2 hezar kursiyên xwecihî winda bike. Di heman demê de partî bi windakirina Parlamenta Galler ku di sala 1998’an de hatiye avakirin re rû bi rû ye.
Reform UK a ku bi nêzîkatiya xwe yên li dijî koçberan tê naskirin, di hilbijartinê de derdikeve pêş. Ev partî ji nîqaşa li ser koçberiyê destek digire.
Wisa diyar dibe ku li Gallerê netewperestên çepgir Plaid Cymru û Reform UK di warê rêjeya dengan de nêzîkî hev in.
Partiya Muhafezekar ku Kemi Badenoch serokatiya wê dike, di bin zextê de ye. Anket nîşan didin ku partî dikare nêzîkî 600 kursiyên xwecihî winda bike.
ARMANCA KESKAN LI LONDONÊ SERKETIN E
Li Londonê bi taybetî Partiya Keskan bi pêşengiya serokê xwe yê nû Zack Polanski û helwesta xwe çepgirtir, armanc dike ku di hilbijartinan de serketinek mezin bi dest bixe.
Ji aliyê din ve Partiya Neteweyî ya Skotlandê (SNP) jî hewl dide ku desthilatdariya xwe li Skotlandê, ku 19 sal in rêveberiya wê dike, biparêze. Anket nîşan didin ku Partiya Karker dibe ku li wir jî dengan winda bike.
Analîstên siyasî, diyar kirin ku bêhêvîbûna dengdêrên Brîtanî ji hem Partiya Karker û hem jî Partiya Muhafezekar zêde dibe.
Li gorî anketa bi navê YouGovê, rêjeya kesên ku li ser Serokwezîr Keir Starmer bi rengekî neyînî difikirin gihîştiye ji sedî 70.
Starmer, di dema xebatên hilbijartinê de banga ‘pêşde çûnê’ li dengdêran kiribû. Her wiha îdîa kir ku Reform UK ‘siyaseta hêrs û parçekirinê’ dimeşîne û ya Partiya Keskan jî ‘sozên vala’ dide.
Serokwezîr, her wiha ji ber ku Peter Mandelson ku navê wî bi bûyerên Jeffrey Epstein derketibû û wekî sefîr li Washingtonê hat wezîfedarkirin rexne kir.
Li gorî medya Brîtanyayê, hin parlamenterên Labourê berî hilbijartinên 2029’an dest bi nîqaşkirina dûrketina Starmer ji wezîfeyê kirine.
