Endama Konseya Fermandariya HPJ’ê Rojîn Fesîh, şehîdên meha Gulanê di şexsê fermandar, hunermend û yek ji pêşenga xeta jina azad Hozan Mizgîn de bibîr anî. Rojîn Fesîh, di heman demê de şehîdên Sêdarê Şîrîn Elemhûlî, Elî Heyderyan, Ferhad Wekîliyan, Ferzad Kemanger û Mihdî Îsmailiyan bibîr anî û soza pêkanîna xeyalên wan dubare kir.
Fermandara HPJ’ê Rojîn Fesîh, diyar kir ku dewleta Îranê li dijî îradeya civakê û kesên ku dixwazin pêşengiyê bikin zextên xwe zêde dike.
Rojîn Fesîh, destnîşan kir ku Îran hewl dide bi polîtîkayên girtin, darvekirin û kuştinê desthilatdariya xwe ferz bike û got ku dewlet dema dikeve zorê serî li rêbazên zextê dide.
Rojîn Fesîh, da zanîn ku di destpêka Gulanê de pênc welatparêzên din ên ku azadî dixwestin hatine darvekirin û got ku armanca vê yekê di nava civakê de tirs avakirine.
‘ŞÎRÎN ELEMHÛLÎ SEMBOLA BERXWEDANÊ YE’
Rojîn Fesîh, diyar kir ku mirov nikare Şîrîn Elemhûlî wekî tenê jinek e ku hatiye darvekirin bigire dest û got ku ew “sembola berxwedan û azadiyê” ye. Rojîn Fesîh got, “Êrîşa di şexsê Şîrîn Elemhûlî de êrîşa li ser têkoşîna azadî, berxwedan û pêşengiya civakê ye.”
Rojîn Fesîh, da xuyakirin ku dewleta Îranê îro jî êrîşên xwe yên li dijî jinan didomîne û got ku polîtîkayên darvekirin û zextê bêhêziya dewletê nîşan didin.
‘ŞERÊ HEYÎ ŞERÊ DESTHILATDARIYÊ YE’
Rojîn Fesîh, anî ziman ku Îran di bin dorpêçek mezin a aborî, siyasî û leşkerî de ye û got ku dewlet êdî hêza wê ya li hember vê rewşê seknandin nemaye. Rojîn Fesîh got, “Ji ber vê yekê êrîşê jin û civakê dike.”
Rojîn Fesîh, destnîşan kir ku destwerdanên derve yên li ser Îranê di destpêkê de di bin navê “ewlehî, azadî û demokrasiyê” de hatine kirin, lê bi demê re derket holê ku ev yek xizmeta berjewendiyên gel nakin.
‘DIVÊ GEL YEKÎTIYA XWE BI XWE AVA BIKE’
Rojîn Fesîh, got ku divê gel yekîtiya xwe ava bike û bi hişmendiya parastina xwe tevbigerin. Rojîn Fesîh, diyar kir ku gel tenê bi hêza xwe dikare mafên xwe biparêze.
Rojîn Fesîh, da zanîn ku li pêşiya Îranê du rê hene û got yan ew ê zextê zêde bikin û teslîmbûnê ferz bikin, yan jî ew ê bi yekbûna bi gel re rêyek reformê vekin.
‘AZADÎ TENÊ BI HÊZA CIVAKÊ RE DIKARE WERE BIDESTXISTIN’
Rojîn Fesîh, di dawiyê de anî ziman ku azadî tenê bi hêza civakê bi xwe dikare were bidestxistin û got ku ger hişmendiya parastina xwe pêş bikeve, gel dê bikaribe xwe li hember her cûre êrîşan biparêze.
