Kombenda Efrînê ya Civakî îro li Qamişloyê li ber navenda Neteweyên Yekbûyî (NY) çalakiyek li dar xist. Kombendê xwest gorên li gundê Til Qirahê yê herêma Şehbayê, heta ku koçber bikarin termên miriyên xwe ji wir bibin, werin parastin.
Bi dehan kesên ji Efrînê ya dagirkirî beşdarî çalakiyê bûn.
Çalakvanan nameyek radestî ofîsa NY’ê kir. Name berî ku were radestkirin, ji aliyê endama Kombenda Efrînê Rojîn Îbiş ve hate xwendin.
Naveroka peyamê wiha ye:
“Ji Neteweyên Yekbûyî û saziyên têkildar ên mafên mirovan re,
Em bi navê Kombenda Efrînê ya Civakî vê bangewaziya lezgîn ji we re dişînin der barê rewşa mirovî ya krîtîk a li herêma Şehbayê û gundê Til Qirahê de ku girêdayî gundewarên bakurê Helebê ye. Li wî gundî gelek goristan hene ku tê de cenazeyên bi sedan efrîniyan hene ku di nava 7 salên borî de dema koçberî wî gundî bûne, jiyana xwe ji dest daye.
Niha xwediyê erdê ku yek ji van goran li ser e, diwaze ku cenaze bên rakirin û bibin gundên wan ên resen li Efrînê, yan jî beramberî erd pereyan bidin. Her wiha gef xwariye ku wan goran wêran bike, eger daxwaza wî pêk neyê.”
Di payemê de ev tişt ji NY, saziyên mafên mirovan û aliyên peywendîdar hate xwestin:
1. Avakirina komîteyeke taybet ji bo şopandina vê mijarê û dîtina çareseriyeke dadmend û mirovî ku rêzê li cenazeyan bigire û mafên xwediyên wan biparêze.
2. Rê li ber wêrankirina goran bigirin, heta ku çareseriyeke guncaw were dîtin.
3. Başkirina şert û mercên aramiyê li herêmê, ji bo xelkê Efrînê bi ewle û dilxwazî vegere malên xwe û termên miriyên xwe bibin gundên xwe yên resen.
