Berdevka Komîteya Têkiliyên Derve ya Kongra Star Emîne Osê ji ANF’ê re li ser hemleya ku ji bo naskirina fermiyeta YPJ’ê hatî destpêkirin, axivî û wiha got, ‘’Hemleya ku me ragihandî, îfadeya ku jin dixwaze di pêşeroja Sûrîyeyê de bi bandor beşdarî hemû qadên jiyanê bibe ye. Pêvajoya ku em dixwazin ji aliyê wê yê leşkerî zêdetir, ew e ku destkeftiyên heyî bên parastin û jin bikaribe di cihê biryarê de cihê xwe bigire. Aliyek din, ev hemle ne tenê ji bo jinên Kurd e, ji bo tevahî jinên Sûriyeyê jî ye. Eger pêşeroja Sûriyeyê diyar bikin, divê bi rengekî xurt beşdarî vê hêzê bibin û bikaribin guhertineke bingehîn ava bikin, wê ev hêza bingehîn mafê jinan mîsoger bike.’’
Emîne Osê di berdewamiya axaftina xwe de bal kişand ser destkeftiyên jinan ên di 14’salan de bi dest xistine û got, ‘’Destkeftiyên jinan ên 14 salan di aliyê wê yê siyasî, rêveberî û leşkerî de ne kêm bûn, rewş û şertên ku YPJ tê de hate damezrandin de ne hesan bûn. Tecrube û profesyoneliya 14’salan a ku bi vê hêzê re çêbûye, wê destkeftiyên siyasî ava bike û guhertinekê di civaka me de bide çêkirin. Hebûna jin a di nav artêşê de pîvaneke ku jin dixwaze bêje ez hevkar im, ez hêz im, ez heme û pêwîste cihê min di navenda biryaran de û di pêşeroja Sûriyê de hebe.
Di vê hemleyê de li Sûriyeyê û derveyî Sûriyeyê me hemû giranî daye ser mijara YPJ û YPJ çawa weke hêzekî di nav artêşa Sûrî de bi xwesertiya xwe were pênasekirin. Divê di çarçoveya qanûnî û hemû desteyên ku wê destûrê binivîsin de hebûn û qanûnên ku bi jinê re eleqeder bin, bên avakirin. Divê jin daîmî di hemû saziyên hikumetê de hebin û li ser wê esasê qanûnên ku jin û îradeya jinê nas bike, bên avakirin. Ev hemle tenê ji bo YPJ’ê ye, lê divê piştî vê ji bo rêxistinên jinan ên Rojava hemleyên berdewam di aliyê qanûnî de werin lidarxistin.’’
Emîne anî ziman ku hebûna YPJ’ê ya di nav artêşê de mîsogerîya parastina destkeftiyên jinan e û got, “Qebûlkirina YPJ’ê di nav artêşê de gava yekê ye ku Sûriyeyê ber bi pirrengî, wekhevî, demokrasî û hevkariyeke rast ve bibe.”
Emîne Osê destnîşan kir ku eger YPJ neyê qebûlkirin, ev yek wê bibe sedemê xeteriyên mezin û got, ‘’Hebûna YPJ’ê guhertineke hişmendiyê dide çêkirin. YPJ hêzeke civakê ye ku xwedî disiplîne, ev hêz wê bihêle ku garantiya hemû destkeftiyên din hebe. Her wiha di entegrasyonê de hîn pirsgirêk hene, pirsgirêka esasî mijara hişmendiyê ye. Entegrasyonê em li ser esasê hevkarî û rêzdayîna taybetmendiyên hev dinirxînin, lê li aliyê hember weke teslîmbûnê tê nirxandin. Tişta ku di civaka Kurd de nayê qebûlkirin ew e ku nabe piştî ewqas têkoşîn û şehadetên hatin dayîn em vegerin rewşa xwe ya berê. Ji ber wê nabe mijara ziman, nasname û dîrokê were paşguhkirin. Qanûnên navnetewî jî rê li pêş vê venakin. Divê gelê Kurd xwedî li nasname, hebûn û destkeftiyên xwe derkeve.’’
