Ji aliyê Komîsyona Ziman, Çand û Hunerê ya Stenbolê ya Partiya Wekhevî û Demokrasiyê ya Gelan (DEM Partî) ve bi şîara, “Rewşenbîr û Hunermend Diaxivin” bi sernavê “Ji bo bîranîna dilê ku xwe daye aşitiyê Sirri Sureya Onder” panelek hate lidar xistin.
Di panela li Navenda Çandê ya Alî Emîrî ya navçeya Fatiha Stenbolê hate lidarxistin de Hevseroka Giştî yê Komaleya Mafên Mirovan (ÎHD) Eren Keskîn pêşkêşiyek kir.
Keskîn anî ziman ku Tirkiye tu demê nebûye dewletek hiqûqê yê demokratîk.
Keskîn diyar kir ku gotina “Ji rojhilatê re demokrasî, ji rojavayê re otokrasî nabe” ya Serokê Giştî yê CHP’ê Ozgur Ozel berhema nêrîneke serdestî ye û wiha got: “Dizane ku ji me re demokrasî kengê tê. Dema ku kujerên ji Şêx Seîd û Seyît Riza heta mirovên me yên di bin çavan de hatin qetilkirin, mirovên me yên di cînayetên kontagerîla de hatin qetilkirin, were dîtin em ê hingî demokratîk bibin. Erdogan di axaftina xwe de di rojên derbasbûyî de got Torosên Spî şaş bû. Lê şofêrê Torosên Spî Mehmet Agar li gel we ye. Divê hûn hesabê wan bidin. Eger herî zêde yên şer dikin aştiyê dixwazin, wê demê dema aştiyê hatiye.”
Rojnamevan Roper Koptaş jî diyar kir ku ji bo civakîbûna aştiyê pêwîstî bi her kesî heye û wiha got, “Hêvî dikim ku em bi hev re Tirkiyeyê bi aram û aştî ava bikin.”
Nivîskar Feyyaz Yaman destnîşan kir ku pêvajo di navbera hêzan de hevsengiyek çêdike û wiha got, “Ji ber ku tevgera Kurd xwe gihandiye hêza ku bibe aliyekî maseyê, di aliyekî maseyê de ye.”
Nivîskar Farûk Eren jî destnîşan kir ku ji dîrokê ve li Tirkiyeyê medyayekî dewletparêz heye û wiha got, “Ew dibêjin ‘Tirkiyeyê Bêtoror’, em jî dibêjin ‘Pêvajoya Aştiyê’. Eger em bi rastî jî bigihin aştî û demokrasiyê divê vê rewşa medyayê were guhertin.”
