Li Dersimê 23’emîn Mihrîcana Çand û Xwezayê ya Mûnzûrê ku bi dirûşmeya “Dersim jiyan e; Dest nede xweza, vîn, ziman û baweriya min” di roja xwe ya dawî de bi bernameya tijî, ji konsera zarokan bigre heta meşa hawirdorê bi coş bi dawî bû.
Di çarçoveya mihrîcanê de Gerok MA bi zarokan re civiya. Di bernameya li Kolana Hunerê de hate lidarxistin, wêneyên hunermendên Kurd hatin pêşandan. Di bernameyê de bi zarokan re çalakiya boyaxkirinê û lîstikên cuda hatin lîstin. Zarokên ku bi enstrumanan stranên Kurdî gotin, bi reqsê demek xweş derbas kirin.
MEŞA HAWIRDOR
Piştî bernameya Gerok Ma, ji Kolana Hunerê heta Parka Mamekî “Meşa Hawirdor” hate lidarxistin. Di meşê de nûnerên partiyên siyasî û rêxistinên civakî yên sivîl û gelek kes beşdar bûn. Beşdarên meşê bi çepikan û tilîliyan, dirûşmên “Li Drrsimê maden nayên xwestin” û “Mûnzûr azad e, wê azad dimîne” berz kirin. Meş li Parka Mamekî bi dawî bû.
KONSERÊN BI COŞ Û GOVEND
Di dawiya mihrîcanê de li Parka Mamekî konserek hate lidarxistin. Bi hezaran kes tevlî konserê bûn û dirûşmên “Bijî Serok Apo” û “Bijî berxwedana zindanan” berz kirin. Hunermend Civan Adar, Golge Ozturk, Kadîr Demîr, Îşîk Berfîn, Soner, Jinên Zaza û Semih Kavramak derketin ser dikê.
Mihrîcan bi konser û gerandina govendê bi dawî bû.
