Mudaxeleya leşkerî ya Trump a li ser Venezuelayê û eleqedarkirina vê oprasyonê ya li gel çavkaniyên petrolê fikarên têkildarî mijara Gronlandê jî zêde kirin.
Trump, şeva Yekşemê di balafirgeha Air Force Oneyê de têkildarî vê mijarê daxuyaniyek da rojnamegeran
Serokê DYE’yê diyar kir ku Danîmaka nikare Gronlandê baş biparêze û got: ‘’Hewcehiya me bi Gronlandê heye. Ez vê yekê ji bo ewlehiya me ya neteweyî dibêjim. Em ê di nava du mehan de bi Gronlandê re eleqedar bibin, piştî 20 rojên din em ê dubare biaxivin.’’
Trump beriya niha di roportajeke xwe de ji pirsa, ‘Operasyona Venezuelayê ji bo Gronlandê tê çi wateyê?’ re bersiva; ‘’Hevparên me wê neçar bimînin ku vê yekê binirxînin. Lê belê bi awayekî teqez hewcehiya me bi Gronlandê heye. Ji bo parastina me hewce ye’’ dabû.
Serokwezîrê Danîmarkayê Mette Frederiksen jî bi awayekî tund nerazîbûnên xwe nîşanî daxuyaniyên Trump da. Frederiksen şeva Yekşemê daxuyaniyek da û got: ‘’Ez bang li DYE’yê dikim ku dawî li gefên xwe yên li ser xakên me bîne. Gotina ku divê DYE, kontrola Gronlandê bi dest bixe, dûrî aqil e.’’
Rayedarên Karên Derve yên Danîmarkayê û Balyozê Washingtonê Jasper Moller Sorenseb jî anîn ziman ku ew hêvî kin ku ji yekîtiya xaka Keyatiya Danîmarkayê re rêz were girtin. Jasper Moller Sorenseb bi bîr xist ku Danîmarka endamê NATO’yê ye û ji garantiyên ewlehiyê yên tifaqê sûd werdigire.
Gronlanda ku nêzîkî 57 hezar nifûsa wê heye, ev demeke dirêj e bala DYE’yê dikşîne. Rêveberiya Gronlandê gelek caran diyar kir ku ew ‘’ne ya firotinê ye’’ û ew ê bi xwe biryara pêşeroja wê bidin. Li gorî anketeke Çileya 2025’an ji sedî 85’ê gelê Gronlandê li dijî vê yekê ye û bes ji sedî 6’ê gelê dixwaze Groland bi DYE’yê ve were girêdan.
Her wiha Trump di meha Kanûnê de diyar kiribû ku ew ê ji bo Gronlandê nûnerekî taybet tayîn bike û vê yekê rê li ber zêdebûna rageşiya di navbera her du welatan de vekiribû.
