Fermandara YPJ’ê Viyan Adar têkildarî geşedanên li herêma Bakur û Rojhilatê Sûriyeyê ji ANF’ê re axivî.
Viyan Adar diyar kir ku weke YPJ ew vê sîstema nû ya bi zihniyeta heyî tê meşandin, ji sîstema berê cudatir nabînin û wiha got, ”Piştî 27’ê Mijdara 2024’an Sûriye di guhertineke mezin re derbas bû û vê guhertinê bandor li hundirê Sûriyeyê û heta dewletên cîran jî kir.”
‘AVAKIRINA YPJ’Ê GUHERTINÊN MEZIN DI CIVAKÊ DE PÊŞ XIST’
Viyan Adar tekez kir ku bi derketina Şoreşa 19’ê Tîrmehê re û bi avakirina YPJ’ê re gelek guhertin û veguhertinên cidî di nav civakê de pêş ketin û wiha axaftina xwe domand, ”Bi şoreşa Rojava ya ku di 19’ê Tîrmehê de destpê kirî re damezrandina YPJ’ê bandoreke mezin çêkir. Desthilata Şamê xwedî destûreke welê ye ku cihê jinê têde nîne û tevahiya gelê Sûriyeyê temsîl nake. Ev zihniyeta ku tê meşandin, dihêle ku YPJ hîn zêdetir têbikoşe û gav paşde neavêje.”
‘XWEPARASTIN PÊDIVÎ YE’
Fermandar Viyan destnîşan kir ku YPJ jinên ji hemû pêkhateyan di nav xwe de dihewîne û wiha pêde çû, ”Weke YPJ ti carî em vê sîstema desthilatdariyê ya heyî qebûl nakin. Ev jî tê wê wateyê ku têkoşîna me wê bi rengekî hîn xurttir bidome. Cihê ku wekhevî lê tune be, xweparastin pêdivî ye. Ji ber ku xweparastin ji bo hemû zindiyan rêbazeke jiyanê ya sereke ye. Mafê her kesî yê xweparastinê heye, ji ber xweparastin mafekî rewa ye. Têkoşîna me jî têkoşîna parastina rewa ye. Êrîşek li ser hebûna jin hebe, wê jin parastina xwe bike.”
Viyan Adar bal kişand ser peymana di navbera QSD û HTŞ’ê de û da xuyakirin ku weke YPJ ew her tim alîgirê çêkirina tifaqê ne. Viyan Adar anî ziman ku lê ji roja ewilî ya Şoreşê û heta niha ew li dijî parçebûna Sûriyeyê ne û bilêv kir ku divê hemû pêkhateyên Sûriyeyê bi yek ruhî bi hev re bijîn.
‘TÊKOŞÎNA YPJ’Ê XWESER E’
Viyan Adar di nav axaftina xwe de ev tişt jî got: “Têkoşîna YPJ’ê, têkoşînek e xweser e. Weke YPJ parçeyek me di nav QSD’ê de jî heye. Lê belê em di bin sîwana QSD’ê de têkoşîn nakin. Weke Yekîneyên Parastina Jin rêxistin û têkoşîna me xweser e. Lê YPJ û QSD bi hev re di asta herî jor de têdikoşin û li kêleka hev şer dimeşînin, ji ber ku armanca me her duyan jî yek e. YPJ û QSD ji bo parastina destkeftiyên Şoreşa Rojava, pêkhateyên Sûriyeyê, ji bo parastina gel û tevahî jinên Sûriyeyê bi hev re têkoşîn dimeşînin. Her wiha weke YPJ tenê fikrê Rêber Apo ji bo me esas e. Destûra ku piştre hatî ragihandin, li dijî peymana di navbera QSD û HTŞ’ê de hatî ragihandin e. Êdî Kurd ne mîna berê ne. Tevgerên Kurd xwedî felsefe û fermandarên zane ne, xwedî tecrube û ezmûnên mezin in.”
Fermandara YPJ’ê bal kişand ser banga Rêber Apo ya ‘Aştî û Civaka Demokratîk’ û destnîşan kir ku dewleta Tirk heta niha jî li hemberî vê banga aştiyê ti gav neavêtine. Fermandar Viyan Adar bilêv kir ku bi riya diyalogê hemû pirsgirêk dikarin bên çareserkirin û got, divê dewleta Tirk ji vir û şûnde gavên cidî û erênî bavêje.
Viyan Adar got, “Sûriye ayîdê gelê Sûriyeyê ye, karê dewleta Tirk li ser vê xakê nîne. Bi hincetên ku weke dewletek cîran dixwaze pirsgirêka Sûrî çareser bike, armanc dike ku Sûriyeyê dagir bike. Pirsgirêka sereke ya li Sûriyeyê mudaxileyên dewleta Tirk in.”
Fermandara YPJ’ê Viyan Adar di dawiya axaftina xwe de bang li hemû jinan kir û got, ”Banga me ji bo hemû jinên Sûriyeyê ye heta ku em jinên Sûrî hêza xwe ya parastinê bi hev re çênekin, em ê nikaribin li hember van zihniyetên ku ji rewşa heyî sûd digrin xwe biparêzin. Divê em weke jin li hemû herêmên Sûrî tecrubeyên xwe belav bikin, ji ber ku parastina me ji bo hemû jin Sûriyeyê ye. Divê jin li her derê peywendiyên xwe xurt bikin û hêza xwe ya parastinê ava bikin, ji derveyî vê wê hebûna me bi tu awayî mîsoger nebe.”
