Gel û eşîrên Rojavayê Kurdistanê ji bo parastina bajarên xwe li dijî gefên êrîşa çeteyên HTŞ û DAÎŞ’ê ku ji aliyê dewleta Tirk ve tên destekkirin, nobetên xwe didomînin.
Nûnerê eşîra Tey Ebdulcebar El-Tey, diyar kir ku gelê Kurd dê heta dawiyê ax û rûmeta xwe biparêze û got ku eşîr, digel ciwanên xwe ji bo parastina gund û bajaran seferber bûye. El-Tey got, “Çeteyên Colanî dibêjin dê werin heta Eyndîwarê. Em ê rê nedin. Weke gel me xwe bi rêxistin kiriye. Li her deverê ji bo parastinê nobet digirin. Me bûyerên li bajarên din dîtin çi bi serê gel anîn. Ji ber vê em ê serî li ber van çeteyan netewînin. Em neviyên Şêx Seyîd in. Lê ew diz in. Ew ê çawa bi me re şer bikin. Her ciwanek me bedêla sed kesê wan e.”
Li aliyê din ji Hesekê Îmad Ehmed, jî anî ziman ku ew amade ne ku hemû bajarên Rojavayê Kurdistanê biparêzin û dê heta dilopa xwîna xwe ya dawî li ber xwe bidin.
Lukman Paşo, jî di axaftina xwe de ji gelê Kobanê re got ku berxwedana gel moral û hêz daye wan û got, “Bila gelê me yê li Hesekê jî hêz bidin hêza me. Ji ber ku ev hêz dê van gelan ji çeteyan biparêzin. Em ji çeteyên Colanî re jî dibêjin Hesekê dê ji bo we bibe goristan. Li her deverê gelê me nobetê digire, em ê tu carî nehêlin ev bajar bikeve kontrola wan.”
