Şehîd Zîlan (Zeynep Kinaci di 30’ê Hezîrana 1996’an de li Dersimê li dijî merasîmeke leşkerî çalakiya fedaî pêk anî. Ev çalakî weke qonaxeke girîng di dîroka tevgerê de tê dîtin û her sal di vê dîrokê de bi çalakiyên curbecur li gelek bajaran tê bibîranîn. Gazî Gulçîn Xoşmêr têkildarî 30’emîn salvegera şehadeta fermandar û pêşenga Apoyî Zîlan nêrînên xwe bi ANF’ê re parve kirin.
‘ZÎLAN BERSIVA LI HEMBERÎ XIYANET, BÊDENGÎ Û DAGIRKERIYÊ YE’
Gulçîn Xoşmêr di şexsê şehîd Zîlan de hemû şehîdên azadiyê bi bîr anî û got, “Di nav Tevgera Azadiya Kurdistanê de her mehek xwedî bîranînên pîroz in. Hezîran xwe di bîranîna Zîlan de derdixe pêş. Zîlan bersiva li hember xiyanet, bêdengî û dagirkeriyê ye. Çalakiya heval Zîlan a ku desthilatdariya dagirkeriyê hejand, rêya azadiyê ya heta dawî tijî serketin û hêvî ji gelê Kurdistanê re hat vekir.”
Gazî Gulçîn Xoşmêr destnîşan kir ku Zîlan xwedî biryar û îdîayeke bêhempa bû û wiha berdewam kir: “Heval Zîlan di nameya xwe de vê xisûsê bi awayekî berbiçav dide nîşandan. Dibêje, ‘Îdiaya min a jiyanê pir mezin e. Ez dixwazim bibim xwedî jiyaneke watedar û çalakiyeke mezin.’ Heval Zîlan di dilê her gerîla û şervanên Tevgera Azadiyê de cihê xwe çêkir. Heval Zîlan li hember dagirkerî û mêtinkariyê bû hêz, îrade, hêvî û cesaret.”
‘BI HEZARAN KEÇ Û XORTÊN KURDISTANÊ DAN PEY DOZA FERMANDAR ZÎLAN’
Gulçîn Xoşmêr diyar kir ku wateya girêdana bi şehîdan, Rêbertî, xak û mirovahiyê vegot û wiha pê de çû: “Bi hezaran keç û xortên Kurdistanê li pey doz û têkoşîna fermandara xwe Zîlan, ber bi azadiyê ve dimeşin. Heval Zîlan ji Rêber Apo, hevalên xwe, gelê Kurd û jinên azadîxwaz piştrast bû. Hêviyên wê yên ji bo pêşerojê mezin bûn. Lewma bêteredut ev çalakiya fedaî pêk anî.”
Gazî Gulçîn Xoşmêr bi van hevokan dawî li axaftina xwe anî, “Gelê Kurdistanê di her kêliyê de xwedî li têkoşîna keç û xortên xwe derket. Gelê me û jinên azadîxwaz wê mîras û têkoşîna heval Zîlan veguhezîne nifşên paşerojê. Em ê her tim di rêya şehîdên xwe de bimeşin. Weke gaziyên şer em bang li gelê xwe û jinan dikin ku ji bo serxistina Pêvajoya Aştî û Civaka Demokratîk bi rola xwe dîrokî rabin.”
