Daxuyanî di dema hevdîtinên li ser agirbestê de hate kirin ku hevdîtin li paytexta Misir Qahîreyê bi navbeynkariya Misir, Qatar û Dewletên Yekbûyî yên Emerîkayê tên meşandin.
El Nûnû Îsraîl sûcdar kir ku li pêşiya agirbestê dibe asteng û got, “Pirsgirêk ne hejmara dîlgirtinê bêne berdan e, pirsgirêk ew e ku Îsraîl ji sozên xwe yên berê vegeriya ye û şer dewam dike.”
Hamas ji ber vê yekê destnîşan dike ku ji bo agirbestek bi cih bê anîn divê garantiyên navneteweyî bêne dayin.
Li gorî malpera nûçeyan a Ynetê ku navenda wê li Îsraîlê ye, bi garantiya Dewletên Yekbûyî yên Emerîkayê, Îsraîlê pêşniyarek pêşkêşî Hamasê kiriye ku wê qebûl bike, derbasî qonaxa duyemîn a agirbestê bibe. Ev pêşniyar jî berdana 10 dîlgirtiyan bi saxî ferz dike.
Beriya niha, di navbera 19’ê Çileyê û 17’ê Adarê de bi agirbesta demkurt re 33 dîlgirtî (8 jê mirî) radestî Îsraîlê hatibûn kirin û Îsraîlê jî nêzî 1.800 girtiyên Fîlîstînî berda bû.
El Nûnû her wiha bêçekkirina Hamasê red kir ku yek ji şertên Îsraîlê yên ji bo bidawîkirina şer e û got, “Çekên berxwedanê ne mijara bazariyê ye.”
Şerê li Xezeyê 7’ê Cotmeha 2023’an bi êrîşa Hamasê ya li ser başûrê Îsraîlê destpê kiribû. Di wê êrîşê de piraniya wan sivîl 1.218 kes hatibûn kuştin. Ji hingî ve ji 251 dîlgirtiyên hatin revandin 58 jê hîn li Xezeyê ne. Tê gotin, 34 ji wan mirine.
Li gorî Wezareta Tenduristiyê ya Xezeyê ku di bin rêveberiya Hamasê de ye, ji operasyona leşkerî ya Îsraîlê ya ji 18’ê Adarê û vir ve herî kêm 1.574 Fîlîstîniyan jiyana xwe ji dest dan. Ji destpêka şer û vir ve li Xezeyê 50.944 kes hatin kuştin.
