Çeteyên hikumeta demkî ya Sûriyeyê (El Emşat, El Hemzat, Sultan Murad û Nûreddîn El Zenkî) yên girêdayî dewleta Tirk, ji 6`ê Çileyê ve êrişî taxên Şêxmeqsûd û Eşrefiyê dikin. Hêzên Ewlekariya Hundirîn li hember êrişan li ber xwe didin.
Hevseroka Meclisa Taxa Şêxmeqsûd û Eşrefiyê Hêvîn Silêman rewşa li her du taxan û berxwedana şêniyan a li hember topbarana sîstematîk ji ajansa ANHA’yê re nirxand û diyar kir ku çete bi giranî binesaziya bingehîn û sivîlan hedef digirin.
Hêvînê bal kişand ser piştgiriya şêniyan ji bo hêzên xwe ya ji bo parastina taxan û wiha dewam kir: “Komên girêdayî Wezareta Parastinê ya Hikûmeta Demkî bi çekên giran û hawanan êrişên hovane li ser her du taxên biçûk pêk tînin, rasterast sivîlan hedef digirin, di encamê de 8 kes şehîd bûn û zêdetirî 56 kesên din birîndar bûn, û topbaran berdewam dike.”
Hêvînê wiha lê zêde kir: “Êriş ji şeva borî ve zêde bûne, pêdiviyên rojane yên şêniyan, di nav de jeneratorên elektrîkê û xetên sereke yên avê hedef digirin, taxên Şêxmeqsûd û Eşrefiyê di rewşek aloz de di bin bombebarana domdar de ne. Hêvîn destnîşan kir ku hin şênî û zarok jî, ji ber topbarana zêde neçar mane ku ji taxê derkevin.”
Hêvînê diyar kir ku şênî piştgiriya Hêzên Ewlekariya Hundirîn dikin li dijî êrişên komên çete. Hêvîn Silêman wiha domand: “Hêzên Ewlekariya Hundirîn pêşveçûna çeteyan asteng dikin û planên wan têk dibin. Gelê me li kêleka şervanên me ye, û serkeftin dê ya me be. Em ê berxwedana xwe li hemû eniyan bidomînin.”
Hêvîn Silêman diyar kir ku Hêzên Ewlekariya Hundirîn, ku îro her du taxan diparêzin, 14 sal in şêniyan diparêzin, û da zanîn piştgiriya gel ji bo hêzên wan dê serkeftinê misoger bike.
Hêvînê bang li gelên Bakur û Rojhilatê Sûriyeyê, Bakur û Başûrê Kurdistanê, Ewropayê û hemû alîgirên aştî û demokrasiyê kir ku ji bo piştgiriya berxwedanê derkevin kolanan û êrişên hovane yên li ser sivîlan şermezar bikin.
Hêvîn Silêman her wiha bang li rêxistinên navneteweyî kir ku ji bo rawestandina xwînrijandinê destwerdanê bikin û da zanîn ku êrişên li ser sivîlan sûcên şer in.
