Kongreya Awarte ya 12’emîn a PKK’ê di navbera 5-7’ê Gulanê de li Herêmên Parastinê yên Medyayê hate lidarxistin. Encamnameya kongreyê û biryarên hatin wergirtin 12’ê Gulanê bi raya giştî re hatin parvekirin. Ji delegeyên kongreyê Cemal Amed li ser kongreyê axivî û anî ziman ku pêvajoya têkoşînê ya 52 salan temam bû û dest bi pêvajoyeke nû ya têkoşînê hatiye kirin.
Ji delegeyên kongreyê Cemal Amed ev nirxandin kir: “Ji bo bidawîkirina têkoşîna 52 salan û destpêkirina pêvajoyeke nû ya têkoşînê, ji bo bidawîkirina pêngava Rêber Apo ya 52 sal, mehek û 10 rojan a li hemberî siyaseta qirkirinê ya sed salan li ser gelê Kurd hate meşandin û destpêkirina pêvajoyeke nû ya têkoşînê, ev civîn gelekî girîng û xweser bû.
PÊVAJOYEKE NÛ YA TÊKOŞÎNÊ
Kongreya 12’emîn a PKK’ê bi vî rengî di pêvajoyeke gelekî dîrokî de pêk hat. Pêvajoya ku bi ‘Banga Aştî û Civaka Demokratîk’ a Rêber Apo destpê kir, bi xwe pêvajoyeke dîrokî ye. Hem ji bo gelê hem jî ji bo gelên bindest ên herêmê. Lewma ev civîna me, Kongreya 12’emîn a PKK’ê weke kongreya destpêkê ya PKK’ê xwedî wateyeke gelekî dîrokî û kûr e, destpêka pêvajoyeke nû ye ku wê ji bo gelê me nirxên hîn bi wate biafirîne.
XWESERIYA TÊKOŞÎNA APOYÎ
Rêber Apo bidawîbûna têkoşîna 52 salan û destpêkirina pêvajoyeke nû ya têkoşînê bi rengê ‘Her bûyereke dîrokî xwedî destpêk û dawiyê ye’ pênase kiribû. Ev yek jî xweseriya têkoşîna Apoyî radixe ber çavan ku van herdu hestan bi hev re dijî; hem dawî hem jî destpêkeke nû. Destpêkirina têkoşîneke nû li ser têkoşîna 52 salan ji aliyê Rêber Apo ve tê kirin, ku di dîrokê de ti şoreşan nekariye vê bike. Hêman û esasê vê kongreyê ew e ku li ser nirxên azadiyê yên ku bi xwe afirandiye, bi nêzîkatiyeke dûrî desthilatdarî û serweriyê fikrê azadiyê, jiyana azad kûr bike, timî di nava têkoşînê de be û xeta azadiya jinê bike xeta azadiyê ya tevahiya gelên herêmê. Hemû hevalên ku beşdarî kongreyê bûn xwedî wê îdîa û biryardariyê bûn ku li ser têkoşîna 52 salan a rastiya rêbertî dest bi pêvajoyeke nû ya têkoşînê bike, têkoşîna ji bo azadiyê timî ji xwe re bike esas, kûrahiya fikrê azadiyê yê Rêber Apo pêk bîne.
PÊNGAVEKE NÛ YA ŞOREŞGERÎ
Bidawîkirina têkoşîna bi rêbaza PKK’ê û destpêkirina pêvajoyeke nû ya têkoşînê, ji ber bidawîbûna hestewariyek afirandibe jî ji ber destpêka nû, pêngava dîrokî ya Rêber Apo, pêngava şoreşgerî ya bi 27’ê Sibatê re destpê kir, pêngava ku bi feraseteke nû ya sosyalîst hemû mirovahiyê bi gelê Kurdistanê re digihîne hev bêguman berpirsyarî, hest, coş, moral û biryardariyê jî diafirîne. Lewma hewaya bingehîn a kongreya me ew e ku pêvajoyeke bi vî rengî ya dîrokî ava kiriye û bi destpêkeke nû re tacîdar dike. Têkoşîna 52 salan bi rengekî hîn bi heybet dike destpêka têkoşîneke nû ya mirovahiyê. Ev yek bingeha kongreya me bû, biryardariya hemû hevrêyên li vê derê bû. Biryardariya bingehîn a kongreyê jî ew bû ku minet, hurmet û silavên xwe pêşkêşî Rêber Apo bike ku pêvajoyeke bi vî rengî da destpêkirin.
BERPIRSYARIYA JI NIHA Û PÊ VE
Her wiha di vê kongreyê de şehadeta hevalê Fûat û hevalê Riza hate ragihandin. Ruhê bingehîn ê kongreyê ew bû ku di şexsê herdu hevalan, şehîdên leheng ên têkoşîna 52 salan em bi bîr anî, bi dilsoziya bi şehîdan re gihîşt wê astê ku têkoşîna 52 salan bi têkoşîneke nû tacîdar bike.
Bersivdayina li gelê me, avakirina civaka demokratîk xeta bingehîn a kongreya me bû. Lewma destpêkirina pêvajoyeke nû ya têkoşînê li ser bingeha têkoşîna 52 salan, bi fêhmkirina rastiya Rêbertî, şehîdan û gelê me dibe, ku ev yek jî esasê kongreya me ya 12’emîn bû. Bi qasî rûmeta vê pêvajoya dîrokî, her wiha em xwedî berpirsyariyeke mezin in. Ez ê bi giraniya vê berpirsyariyê nêzî pêvajoya ji niha û pê ve bibim.”
