Bi boneya 8’ê Adarê Roja Jinan a Cîhanê, Yekîtiya Jinên Ciwan li Navenda Çand û Hunera Baqî Xido ya li bajarê Kobanê şahiyek lidar xist. Di heman demê de li avahiya nû ya Zanîngeha Kobanê bi sedan xwendekar li hev kom bûn û 8 Adarê bi cil û bergên Kurdî pîroz kirin.
Koordînasyona Jinan a Kantona Firatê jî ji bo bîranîna şehîdan berê xwe da Goristana Şehîd Dîcle û gul danî ser gorên şehîdan.
Li Goristana Şehîd Dîcle Hevseroka Meclîsa Malbatên şehîdan a Kantona Firatê Sara Xelîl axivî û diyar kir ku ew bi saya şehîdan û Rêber Apo li vir in û got, “Her şehîdek bi xwe wateyeke û jiyaneke nû ye. Em bi saya şehîdên xwe li vir in û em bi saya Rêberê xwe jî her rojê xwe îsbat dikin.”
ZANÎNGEHA KOBANÊ
Şahiya Zanîngeha Kobanê jî ji aliyê Yekîtiya Xwendekarên Demokratîk a Sûriyeyê ve hat lidarxistin. Şahî bi deqeyekê rêz dest pê kir. Xwendekara Zanîngehê Firyaz Remo axivî û diyar kir ku ew bi saya Rêber Apo bi azadî cejnên xwe pîroz dikin û got, “Bi boneya 8 Adarê roja jinê li hemberî desthilatdariyê rabû û jê re îspat kir ku êdî wê ew ê nekevin xefka desthilatdariyê. Îro jî em dibînin ku jinên Kurd û jinên cîhanê bi fikir û felsefeya Rêber Apo xwe bi rêxistin dikin. Şervanên YPJ’ê di nava çeperên şer de li ber xwe didin. Îro jî em li vir bi pênûsa xwe em ê xeta xwe ya têkoşînê bilind bikin û azadiyê bighînin lûtkeyê.”
Piştre şahiya li zanîngehê bi helbest, komên dîlanê, stran, govend û berzkirina dirûşma ‘Jin, Jiyan, Azadî’ bi dawî bû.
ŞAHIYA YEKÎTIYA JINÊN CIWAN
Ji aliyê Jinên Ciwan a Kantona Firatê jî şahiyek hat organîzekirin. Şahî li Navenda Çand û Hunera Baqî Xidoyê pêk hat. Di şahiyê de tabloyên şehîdan, alavên folklorîk ên kevn û nameya Rêber Apo hate nîşandan.
Endama Kongra Star a Kantona Firatê Xunav Xelîl axivî û got, “Bi fikir û felsefeya Rêber Abdullah Ocalan em gihiştin vê astê. Em 8’ê Adarê li Rêber Abdullah Ocalan û hemû jinan pîroz dikin û em ê bihêlin ku 8 Adarê bibe wesîleya azadiya fîzîkî a Rêber Apo.”
Şahî bi berzkirina dirûşmeyan û gerandina govendê bi dawî bû.
