Tevgera Şoreşger a Yekbûyî ya Jinan (KBDH) bi wesîleya 8’ê Adarê Roja Jinên Kedkar ên Cîhanê daxuyaniyeke nivîskî da.
KBDH’ê, destnîşan kir ku berdêla şer a herî giran jin didin û hat gotin ji ber polîtîkayên şovenîzm, netewperestî û nîjadperestî ya li dijî jinê, civak jî dirize. KBDH’ê, diyar kir ku ew ê li dijî jiyanek ku mafê karkeran lê bê desteserkirin, xizanî kûrtir dibe, qeyran û şer giran dibe têkoşîna xwe ya şoreşgerî mezin bikin û got, “Em vê jiyana ku ji aliyê pergala serdest a mêr ve hatiye ferzkirin qebûl nakin. Mejiyê serdest ê mêr û dîktatoriyên faşîst armanc kir ku jinê bêrêxistin û civak jî bê rêber bihêle. Kuştina jinan di koka qirkirina civakî û hilweşîna ekolojîk de cih girtiye û ji bo parastina desthilatdariya xwe veguheriye amûrekê. Jiyana ku li ser jinê tê ferzkirin; Li şûna azadiyê koletî ye, li şûna wekheviyê bindestî ye, li şûna jiyanê mirin e. Lê belê bi nasnameya xwe ya jinê û têkoşîna xwe ya azadîparêz re em van ferzkirinan qebûl nakin û dê têkoşîna xwe bidomînin.”
‘EM REJÎMÊN WE YÊN FAŞÎST RED DIKIN’
KBDH’Ê got, “Em weke jinên Tirkiye û Kurdistanê polîtîkayên zayendperest, faşîst û zextên sîstematîk ên li ser me tên meşandin qebûl nakin. Em pêkanînên ku jinan di nava koletî û newekheviyê de dihêle red dikin û sînorên pergala serdest a mêr nas nakin.”
‘TIFAQA JINAN’
KBDH’ê, destnîşan kir ku serketina têkoşîna azadiya jinê bi tifaqên berfireh pêkan e û ev tişt got, “Pergala serdest a mêr bi her awayî hewl dide ku jin nebin yek. Lê belê em dizanin ku em ê bi hev re li ber xwe bidin, îradeya hevpar pêş bixin û têkoşînê berfireh bikin. Teqez em ê bi ser bikevin.”
‘DIVÊ EM XWEPARASTINÊ BAŞTIR PÊŞ BIXIN’
KBDH’ê got, “Dema ku em protestoyên kolanan û bertekên ferdî veguherînin têkoşîna rêxistinkirî, wê demê em dikarin li dijî kuştina jinan bisekinin û xweparastinê xurt bikin. Weke pêkhateyên KBDH’ê em ê ji bo berfirehkirina têkoşîna yekbûyî û misogerkirina azadiya jinê tempoya xwe mezintir bikin.”
BANG LI JINAN HAT KIRIN
KBDH’ê di dawiyê de got, “Weke jin em nikarin jiyana xwe ji rehma rejîmên faşîst, zayendperest, neteweperest û paşverû re bihêlin. Bi xurtkirina têkiliyên xwe re em ê têkoşîna xwe ya hevpar di asta herêmî û gerdûnî de berfireh bikin. Em ê bi rêxistina xwe parastina xwe bikin, bi hişmendiya zayendî em ê mafên xwe biparêzin. Bi îdîaya ku em bûne hêvî û pêşengên têkoşîna jinên cîhanê, em bang li hemû jinên Tirkiye û Kurdistanê dikin ku têkoşînê bilind bikin û ber bi serkeftinê ve bimeşin.”
