Daxuyaniya Berdevkiya Çapemeniyê ya Komîteya Têkiliyên Derve ya KCK’ê bi vî rengî ye:
“Ji bo bersiva li Banga Aştî û Civaka Demokratîk a dîrokî ya Rêber Apo ku 27’ê Sibatê da, PKK’ê kongreya 12’emîn civand, biryar da û ev yek ji raya giştî ya cîhanê re ragihand. PKK’ê bi Kongreya 12’emîn re biryara xwe eşkere kir ku xwe fesix kiriye, her wiha li ser banga Rêber Apo stratejiya têkoşîna çekdarî terikandiye. Sekna xwe ya bi biryar a li pêşberî pêvajoyê jî bi şewitandina çekan nîşan da ku bi pêşengiya Hevseroka Konseya Rêveber a KCK’ê hevrê Besê Hozat komek ji 30 kesî 11’ê Tîrmeha 2025’an çekên xwe şewitand.
Di vê demê de ku li herêma me û welatê me bûyerên girîng diqewimin, tê dîtin bê projeya Aştî û Civaka Demokratîk a Rêber Apo çiqasî girîng û jiyanî ye. Her kesên alîgirê aştî, demokrasî û azadiyê bi hesasiyeteke mezin nirxandin. Li pêşberî van pêşketinan, Nêçirvan Barzanî li Hewlêrê di civînekê de têkildarî helwesta tevgera me û pêşketinên wê daxuyanî û nirxandinên neyînî da ku van pêşketinan red dike. Ev daxuyanî bi ti awayî nayê qebûlkirin. Nêçirvan Barzanî bi nirxandinên xwe yên neheq û berevajîkirina rastiyan kete nava helwesteke neyînî ku ziman û mejiyê dijberên çareseriyê dubare dike. Axaftina bi argumanên delweta Tirk xizmetê ji gelê Kurd û hêzên demokrasiyê re nake. Şaşitî û kêmasiyeke mezin e ku Nêçirvan Barzanî bi wezîfeyeke welê radibe ku weke ‘nakokî’ di navbera Rêber Apo û tevgera me de heye’ nîşan dide û hewl dide têgihiştineke welê biafirîne ku weke ‘PKK li Rêber Apo guhdarî nake’ bide nîşandan.
Kurd hemû, her wiha her kesên alîgirê aştiyê baş zanin bê ev zimanê dijber ê kê ye. Bêguman Nêçirvan Barzanî dikare bi Komara Tirkiyeyê re têkiliyê dîne, kes ne li dijî vê yekê ye. Lê belê rewşeke manîdar e ku vê daxuyaniya xwe ya neyînî beriya serdana Tirkiyeyê da, her wiha di 9’ê Cotmehê de eşkere kir ku destpêka salvegera komploya navneteweyî ye û salvegera dagirkirina Serêkaniyê û Girê Spî ye. Em vê daxuyaniya ku nîşaneya mejiyê wî ye red dikin û pêşkêşî hemû derdorên hestiyar dikin. Em li bendê ne ku Nêçirvan Barzanî vê helwesta xwe ya neyînî biterikîne.”
