Li Mêrsînê ji bo şermezarkirina komkujiyên li dijî Elewiyan li Parka Ozgur Çocuk daxuyanî hat dayîn. Di daxuyaniyê de pankarta “Komkujiyên Elewiyan ên li Sûriyeyê rawestînin” hate vekirin. Pêkhateyên Platforma Ked û Demokrasiyê ya Mêrsînê jî tevlî daxuyaniyê bû û di daxuyaniyê de gelek caran dirûşmeyên “Kujer HTŞ ji Rojhilata Navîn bicehime”, “Sûriyeya demokratîk” û “Bijî piştevaniya gelan” hate berzkirin.
Rêvebera Komeleya Çandê ya Elewiyan a Ereb Ozcan Damla di daxuyaniyê de axivî û wiha got: “Divê têketina Colanî û hikûmeta HTŞ’ê ji bo welat were qedexekirin. Li Sûriyeyê revandin, destdirêjî û komkujiya li dijî jinan nayê qebûlkirin. Em ê li hemberî vê qirkirinê bêdeng nemînin. Divê rêveberiya HTŞ’ê demildest dawî van êrîşan bîne û em polîtîkaya bi darê zorê ji cih kirinê şermezar dikin.”
Hevseroka DEM Partiyê ya Mêrsînê Bedriye Kuş jî wiha got: “Em dibînin ku ji aliyê zîhniyeta Colanî ve operasyonên qirkirinê li dijî Elewiyên Ereb û kesên xwedî baweriyên cuda didomin. Em careke din diyar dikin ku em vê zîhniyetê qebûl nakin û têkoşîna xwe ya li dijî vê bidomînin.”
Parlementerê CHP’ê yê Mêrsînê yê berê Aytug Atici wiha got: “Ev qirkirina Elewiyan e. Qirkirin li ku derê cîhanê bibe bila bibe, li dijî kî were kirin bila were kirin sûcê mirovahiyê ye. Yên ku li dijî vê sûcê nasekinin divê mirovahiya xwe lêpirsîn bikin.”
