Helbestvan, lêkolîner û rexnegirê navdar Ezîz Nemetî yê ku bi navê Ava Şîn dihat naskirin, di 66 saliya xwe de li bajarê Urmiyê wefat kir.
Navenda Çanda Rojhilatê Kurdistanê ya Ewropayê sersaxî ji malbata Ezîz Nemetî re xwest.
Di peyamê de wiha hate gotin: “Wefata mamoste Ezîz Nemetî ji bo civaka Kurd bi taybetî ji bo ziman, çand û wêjeya Kurdî windahiyeke mezin e. Ji ber ku mamoste Nemetî 50 sal ji bo ziman, lêkolîn û çanda Kurdistanê têkoşiya.
Mamoste Nemetî bi dilê xwe yê kûr ê Kurdewarî xizmetî gelê xwe û zimanê xwe kir û gelek caran bi zext û çewsandina desthilatdarên Îranê re rû bi rû ma.
Weke Navenda Çanda Rojhilatê Kurdistanê ya Ewroapyê, em sersaxiyê ji malbata mamoste Ezîz Nemetî re dixwazin û soz didin ku heta em bigihêjin armanc û daxwazên wî yên neteweyî em ê li ser şopa wî bin. Em sersaxiyê ji gelê Kurd, civaka Rojhilat û bi taybet jî ji gelê Urmiyê re dixwazin.”
EZÎZ NEMETÎ KÎ YE?
Nivîskarê wêjeyî Ezîz Nemetî di sala 1959’an de li gundê Kanî Spî yê bajarê Şînoyê ji dayik bû.
Nemetî ku li Şînoyê li ser ziman û wêjeya Kurdî xwendiye, li Zanîngeha Erdebîlê weke zimanzan qedandiye.
Di kovarên Sarwa, Bayan, Mehabad û gelek kovarên din de gotarên wêjeyî nivîsandine.
Ezîz Nemetî bi navê Ava Şîn dihat nasîn, mirovekî xwîngerm bû û ji bo weşandin û çapkirina çand û wêjeya Kurdî gelek hewl da.
Hin berhemên wî ev in; Antolojiya Çîrokên Kurdî, Şoreşa Şêx Ubeydullah Nehrî û di pirtûka wî ya bi navê Dadga de wergerên gelek helbest û çîrokan hene.
