Li bajarê Şarlova (Charleroi) yê Belçîkayê Mala Çandê ya Med bi çalakiyeke bi beşdariya gelek Kurdistaniyan hate vekirin. Bernameya ku gelek hunermendên TEV-ÇAND Ewropa tevlî bûn, di salvegera şehadeta Ozan Mizgîn de pêk hat.
Tê payin ku mala çandê ji bo ciwan û zarokan li qadên çand, huner, ziman û wêjeyê kar bike û bibe navendeke girîng.
Li dû deqeyeke rêzgirtinê rojnamevan Selahattîn Soro li merasîmê axivî û got, “Em gelekî welê ne ku bi ziman, çand û kevneşopiya xwe bi hezaran salan li ser piyan man. Gelek dewlet û welat hilweşiyan, lê belê çand û zimanê gellan dewam dike. Vê tevgerê zêdeyî 50 salî li hemberî înkar û îmhayê li ber xwe da, di vê oxirê de bi hezaran can feda kir. Ji ber ku bi çekê karîbû li henmberî înkar û tinekirinê li ber xwe bide. Lê belê li hemberî dejenerekirin û asîmîlasyonê em ê têkoşîna xwe bi stran, çand û zimanê xwe dewam bikin. Ev pêvajo pêvajoya parastina çandê, xwedîderketina li ziman û pêşvebirina hunera Kurd e. Ji ber vê jî vekirina navendeke bi vî rengî li Ewropayê ji bo çand û hunera Kurd gelekî girîng e.”
Piştre hunermend Bermal axivî û Ozan Mizgîn bi bîr anî.
Ozan Şemdîn jî qala girîngiya navendeke bi vî rengî taybet ji bo karên çand û hunerê kir.
Piştî axaftinan li ser jiyan û kesayetiya Ozan Mizgîn sînevîzyonek hate nîşandan. Piştre jî Koma Pel, Hemîd Ûrmiye, hunermend Bermal û Ozan Şemdîn hunera xwe pêkêş kirin.
Navnîşana Mala Çandê ya Med a li bajarê Charleroi yê Belçîkayê bi vî rengî ye:
Rue De L’etang 88, 6042 Lodelinsart, Belçika.
