Çalakgerên ku li dora dirûşma “No Kings” (Na ji Qral re) li hev kom bûn, rêveberiya Trump şermezar kirin.
Li gorî amadekaran 7 milyon mirov, li çar aliyên welêt beşdarî xwepêşandanan bûn.
Li taxa Forest Hills a New Yorkê bi sedan kes serê sibehê li hev kom bûn, dirûşma “Em ji welatê xwe hez dikin, em nema dikarin xwe li Trump rabigirin” qîriyan.
Di nava rojê de zêdeyî 2700 çalakî hatin plankirin, hin ji van li bajarokên biçûk, hinek jî li bajarên mezin hatin lidarxistin. Li derdora avahiya Mar-a-Lago ya li Flordiayê ku Trump dawiya hefteyê lê bû, xwepêşandanek pêk hat.
Kamala Harris a ku di hilbijartinên serokatiyê yên 2024’an de li hemberî Trump kete pêşbirkê û stêrkê Hollywoodê Robert de Niro jî piştgirî dan xwepêşandanan.
Xwepêşandana destpêkê ya mezin a ku ji aliyê kolektîfa “No Kings” ve meha Hezîranê hate lidarxistin, bû çalakiya herî berfireh a şermezarkirinê ku piştî vegera Trump a li Qesra Spî pêk hat. Çalakiya duyemîna girseyî jî li pîrozbahiya rojbûna 79’an a Trump rast hat ku li paytextê bi merasîmeke leşkerî hate pîrozkirin.
Trump di dema xwepêşandanên şermezarkirinê yên Hezîranê de gotibû, wê bi “Hêzeke gelekî mezin” bersivê bide. Vê hefteyê jî ji Fox Newsê re axivî û got, “Min weke qral pênase dikin. Ez qralek nînim.”
JI KOMARGERAN SÛCDARIYA ‘TERORÎST’
Lê belê hin lîderên komarger xwepêşandêr bi “terorîstiyê” sûcdar kirin. Serokê Meclîsa Nûneran Mike Johnson çalakî weke “Seferberiya nefretê ya li dijî Emerîkayê” pênase kir û got, “Hûn ê li wê derê piştevanên Hamasê û endamên Antifa’yê bibînin.”
Parlamenterê Minnesotayê Tom Emmer jî Demokrat bi “Serîtewandina li ber baskê terorîst ê partiya wan” sûcdar kir.
JI DEMOKRATAN BANGA DIJBER
Lîderê Demokratan ê li Senatoyê Chuck Schumer li ser platforma X’ê peyamek weşand û got, “Nehêlin ku Donald Trump û Komarger we aciz bike. Dengê xwe bidin bihîstin.”
