Îro li Bexdayê şandeyên Hikûmeta Herêma Kurdistanê û Hikûmeta Iraqê li ser 16 xalên têkildarî sîstema gumrikê û ASYCUDA gihiştin lihevkirinekê.
Li gorî lihevkirinê, dê desthilata tomarkirina şîrketan di sîstema û ASYCUDA de ji Herêma Kurdistanê re were dayîn û zimanê Kurdî dê li pergalê were zêdekirin, nasnameya gumrikê dê di navbera her du aliyan de were yek-kirin.
Di heman demê de bi rêya komîteyek hevbeş, pirsgirêka deriyên Herêma Kurdistanê yên ku hîn bi fermî nehatine naskirin, dê were çareserkirin. Pirsgirêka bexşandinên (muafiyet) gumrikê û parastina hilberîna navxweyî jî, bi girêdayî kontrolên kalîteyê yên ji her du aliyan ve ji bo kelûpelên hawirdekirî, dê were çareserkirin.
Herwiha di lihevkirinê de tê gotin ku herêmên gumrikê yên azad yên her du aliyan dê werin naskirin û hemû belgeyên Lijneya Veberhênanê ya Herêma Kurdistanê dê di sîstema ASYCUDA de werin bicîhkirin. Her guhertinek li deriyan were kirin dê were parvekirin û kopiyek ewle ya pergalê dê li Ofîsa Teknolojiya Agahdariyê ya Herêma Kurdistanê ji bo tevahiya Iraqê were hilanîn. Her wiha dê ji hêla karmendên Hikûmeta Federal ve perwerde ji karmendên deriyê Herêma Kurdistanê re were dayîn.
Li gor agahiyan, ev lihevkirinê di civîna bê ya Desteya Wizarî ya Aborî ya Iraqê de were pejirandin.
