Şêniyên Wargeha Penaberan a Şehîd Rustem Cûdî (Mexmûr) piştî nimêja Cejna Qurbanê ya siharê berê xwe dan Goristana Şehîd Nûjîn a wargehê û destpêkê cejna şehîd û xizmên xwe pîrozkirin.
Piştre şêniyan berê xwe dan Saziya Malbatên Şehîdan, li wir axaftin hatin kirin û cejna hev pîroz kirin. Beriya ku axaftin werin kirin ji bo tevahî şehîdên Tevgera Azadiya Kurdistanê deqeyek rêz hat girtin. Piştî rêzgirtinê Mela Elî Spêrtî axivî.
Mela Elî di destpêka axaftina xwe de cejna Qurbanê li tevahî Umeta Îslamê pîroz kir û wiha axivî: “Her olek, her baweriyekê cejn û rojên wan ên taybet hene. Di Îslamê de jî du cejnên taybet hene, ew jî cejna Remezanê û cejna Qurbanê ye. Em hêvîdarin ev cejn bibin wesileya aştî, wekhevî, xwişk û biratiyê. Welatê ku xwe pêşengê Misilmanan dibînin Erebistana Siûdî ye, ji wê derê heta bi Îranê li hemberî hevdû ‘qehremanin’ lê li hemberî dagirkeriyê û zilmê destşikestîne û di bin fermanên wan de ne. Ev berovajî Îslamê ye, Îslametî vê qebûl nake.”
Di dewama axaftina xwe de Mela Elî bal kişand li ser ambargo û rêgiriya li ser wargehê û wiha domand: “Di dîn de, di zimanan de, di nîjad de em xwişk û bira ne, lê mixabin ji hemû dagirker û sitemkaran re Hewlêr, Kurdistan vekiriye lê ji bo me qedexe ye. Ev ne uslubê Îslamiyetê û ne jî yê mirovahiyê ye. Em hêvîdarin em hemû yek dest û yek dil bin.”
Piştî axaftinan, xelkê wargehê cejna hev pîroz kirin.
