Welatiyan ji saetên sibe ve qadê ku bi alên kesk û sor û zer xemilandî dagirtibûn bi dîlanan reng û dengê xwe dan pîrozbahiyê.
Di şahiyê de sloganên; ‘Bijî Serok Apo’ û ‘Jin, jiyan, azadî’ deng veda û stranên xwe gotin. Di pîrozbahiya ku bi deqeyek rêzgirtinê destpê kir de Komîteya Amadekar a Newrozê, Hevserokê DBP’ê yê navçeya Pirsûsê Mahîr Bulbul û Hevseroka DEM Partiyê ya Rihayê Sema Aişeoglû derketin ser dikê. Piştre endama Meclisa Dayikên Aştiyê ya Riha Meyaser Korkmaz axivî û bal kişand ser ‘Banga Aştî û Civaka Demokratîk’ a Rêber Apo û wiha got: “werin em bi hev re vê pêvajoyê biparêzin. Ev fersendek mezin e. Lê agirbestek yekalî pêvajo nameşe.”
NERAZÎBÛNA LI HEMBERÎ KOMKUJIYA KOBANÊ
Parlamenterê DEM Partiyê yê Rihayê Ferît Şenyaşar bal kişand ser wate û girîngiya Newrozê û wiha axivî: “em ê Newroza 2025’an bikin Newroza azadiyê. Şerê li Rojhilata Navîn nêzî Tirkiyeyê dibe. Em ê rûnanin û li bendê namînin. Em ê têkoşînê bidomînin. Du roj berê li Kobanê komkujiyek pêk hat. 10 sivîl jiyana xwe ji dest dan. Em êrişa li wir weke êrîşa li dijî tevahiya gelê Kurd dinirxînin.”
Piştre peyamê ku ji aliyê dîlên azadiyê ve hatibûn şandin hatin xwendin.
‘OCALAN JI BO AŞTIYÊ GAV AVÊT’
Di dawiya pîrozbahiyê de parlementerê DEM Partiyê yê Rihayê Omer Ocalan axivî û wiha got: “Pirsûs cîranê Kobanê ye. Pêwîst e Tirkiye destê aştiyê dirêjî Rojava bike. Bi salan e li Rojava jiyan heye. Mudaxele li kesî nekirine, zimanê kesî qedexe nekirine û li kesî zilm nekirine. Ji Rojava kevirekî bi tenê jî nehatiye avêtin vê derê. Wan kesan tenê li dijî DAÎŞ’ê şer kirin. Lê belê beriya du rojan li Kobanê komkujiyeke mezin rû da. Em vê komkujiyê şermezar dikin û careke din dubare dikin ku em vê komkujiyê tu carî qebûl nakin. Weke ku hûn jî dizanin, birêz Abdullah Ocalan ji bo sekinandina rijandina xwînê û pêkanîna aştiyê gaveke mezin avêtiye. Xwedî wê hêzê ye û dikare aştiyê pêk bîne. Xwe ji bo vê pêvajoyê amade bikin. Banga me li ciwanan e. Pêvajoyê baş bişopînin û baş siyaset bikin. Ev gel êdî gelekî hişyar e.”
DAYIKAN AGIR PÊXISTIN
Piştî axaftinan Dayikên Aştiyê agirê Newrozê pêxistin. Şahî li gel stranên hunermend Kadîr Çat hatin gotin û pîrozbahî bi govendan bi dawî bû.
