Bi hezaran şêniyên bajarê Qamişlo û malbatên şehîdan cenazeyê şehîdên QSD’ê Devrim Herekol (Welîd Osman) û Cebel Efrîn û endamê Hêzên Ewlekariya Hundirîn Şervan ji pêşiya avahiya Meclisa Malbatên Şehîdan a taxa Enteriyê ya Qamişloyê wergirtin û bi karwanekî ber bi Pakrewangeha Şehîd Delîl Saroxan ve bi rê ket.
Li pakrewanehê merasîmek hat lidarxistin. Di merasîmê de dirûşmên “Şehîd namirin”, “Bijî berxwedana Rojava”, “Bijî berxwedana Kobanê” û “Bijî berxwedana YPJ û YPG” hatin berzkirin.
Ji bo şervanê QSD’ê Nemir (Mehmûd Mihemed) ê ku 25’ê Çileyê li Çilaxa şehîd bûbû, Mihemed Ehmed Sadûn (Çekdar Qamişlo) ê ku 17’ê Çileyê li Dêrazorê şehîd bûbû û Dilşêr Qerebaba (Omer Hêro) yê ku 18’ê Çileyê li Tebqayê şehîd bûbû merasîma xiyabî pêk hat.
Merasîm bi deqeyek rêzgirtin dest pê kir. Piştre endamê Meclisa Malbatên Şehîdan Cibraîl Mistefa axivî û got, berxwedana lehengane ya gelê herêmê bi destkeftiyên siyasî û hiqûqî tacîdar bû.
Cibraîl Mistefa diyar kir ku gelê Kurd tu carî cudexwazî nexwestiye, lê timî daxwaza bicihkirina mafên xwe yên çandî û zimanî di destûrê de dike.
Ji rêveberên Meclisa Leşkerî ya QSD’ê Şehrezad Qamişlo got: “Ew tu carî axa welat terik nakin. Ev ax a gelê wê ye û destkeftiyên dayik û bavên me ne.”
Şehrezad Qamişlo soza şopandina xeta şehîdan da û anî ziman ku tevahî hewldanên têkbirina gelê Kurd û destkeftiyên wê têk çûn û got: “Parastinê herêmê dê bidome, ji ber ku rêya şehîdan rêya rûmetê ye.”
Piştî axaftinan nasnameyên şehîdan hatin xwendin. Cenazeyên şehîd Devrim Herekol, Cebel Efrîn û endamê Hêzên Ewlekariya Hundirîn Şervan veşartin.
